Qaǵazda bar, ómirde joq: ArtSport jobasynda jeńgetaılar men jezóksheler qalaı jumys istegen
Erbolat Dosaev ortalyq kommýnıkatsııalar qyzmetinde ótken baspasóz máslıhatynda qala ákimdiginiń ArtSport jobasyn tekserýge bastamashy bolǵanyn aıtty.
«Baǵdarlamadaǵy ózgerister ákimdiktiń bastamasymen engizildi. Sebebi balalarymyzdy qoldaýǵa 20 mlrd teńge bólgen edik. Osy boıynsha keı tustarda kemshilikter shyǵatyny anyq boldy... Aqsha tabý úshin aram pıǵyldy kisiler baǵdarlamadan úlken bir ilik tapqan. Ol kezde naqty talaptar joq edi. Baǵdarlamada eń bastysy «osynsha adam jumys isteıdi, osynsha bala barady» degen qurǵaq sóz ǵana boldy jáne sol úshin memleket qarajaty tólengen. Ol boıynsha burys sheshimder qabyldanǵan dep esepteımin jáne biz odan tıisti qorytyndy shyǵardyq. Jaqynda ákimdik pen máslıhattyń revızııa komıssııasynyń esebi boldy. ArtSport-ty tolyq tekserip, álsiz tustaryn kórsetken soń revızııalyq komıssııa bizdi qoldady. Aıtqym kelgeni, jobadaǵy adamdar qujatta ǵana bar dep eseptelip kelgen, al balalar úıirmege tipti qatyspaǵan. Balalardyń barmaǵany de-fakto. Sondyqtan balalardy psıhologqa kórsetýdiń qajeti joq», - dedi Almaty ákimi.
Ol sondaı-aq almatylyq balalardyń joǵaryda atalǵan adamdarmen qarym-qatynasta bolmaǵanyna eshqandaı kepildik bere almaıtynyn jetkizdi.
«Eger ata-analar habarlassa, ákimdik balalarǵa tıisti kómekti kórsetýge daıyn. Ázirge qala turǵyndarynan ondaı ótinish túsken joq», - dedi Erbolat Dosaev.
Eske salsaq, buǵan deıin Májilis depýtaty Nartaı Sársenǵalıev Áleýmettik-mádenı damý komıtetiniń otyrysynda buryn prıton uıymdastyryp, sotty bolǵan kisilerdiń Qazaqstannyń 6 aımaǵynda «ArtSport» baǵdarlamasymen jumys istegenin aıtqan edi.
Bas prokýratýra atalǵan málimetti rastap, joba aıasynda seks-ındýstrııanyń burynǵy qyzmetkerleri Almaty, Shymkent qalalary, Qaraǵandy, Mańǵystaý, Batys Qazaqstan jáne Shyǵys Qazaqstan oblystarynda jumys istegenin habarlady.
