Kúnine 30 zańbuzýshylyq anyqtalady: sanıtarııalyq baqylaý tsıfrlyq formatqa kóshti
ASTANA. KAZINFORM – Tsıfrlyq platforma engizilgenge deıin sanıtarııalyq-epıdemıologııalyq qyzmettiń mamandary ondaǵan túrli qaǵaz esepti qolmen daıyndaıtyn.
Aqparatty jınaý jáne taldamalyq esepterdi ázirleý úsh kúnnen eki aptaǵa deıin ýaqyt alatyn, al baqylaýdaǵy nysandar, medıtsınalyq tekserýler men vaktsınatsııalaý boıynsha tolyq málimet bolmaǵan.
Búginde bul úderister tolyqtaı avtomattandyrylǵan, dep habarlaıdy QR Densaýlyq saqtaý mınıstrliginiń baspasóz qyzmeti.
Aqparattyq júıede memlekettik baqylaýdaǵy 202 myń nysan týraly málimet tsıfrlandyrylyp, 198 myń paıdalanýshy tirkelgen. Onyń ishinde 114 myńy – bıznes ókilderi, sonyń ishinde medıtsınalyq uıymdar.
Jańa júıeniń basty artyqshylyqtarynyń biri – kásipkerdiń jeke kabıneti.
Endi kásiporyndar málimetterdi qashyqtan joldap, sanıtarııalyq dárigerlerdiń usynymdaryn alyp, baqylaý nátıjelerin qadaǵalap, anyqtalǵan buzýshylyqtardy ýaqytyly joıa alady.
Sondaı-aq bızneske burynǵydaı bir qujatty qaıta-qaıta usynýdyń qajeti joq. Memlekettik derekqorlarmen ıntegratsııanyń arqasynda aqparattyń edáýir bóligi avtomatty túrde alynady.
2026 jyldyń alǵashqy jartyjyldyǵynda júıe arqyly óndiristik baqylaý boıynsha 13 562 esep qabyldandy.
Avtomatty taldaý nátıjesinde 4 777 buzýshylyq anyqtalyp, 470 nysan eshqandaı sýbektıvti aralasýsyz, tek qaýipterdi basqarý júıesiniń negizinde memlekettik baqylaý josparyna engizildi.
Sonymen qatar tsıfrlyq platforma kún saıyn 5-ten 30-ǵa deıin jaramdylyq merzimi ótken medıtsınalyq kitapshalardy, ruqsat berý qujattarynyń joqtyǵyn jáne usynylmaǵan eseptilikti anyqtap, tekserý júrgizilgenge deıin-aq zań buzýshylyqtardyń aldyn alýǵa múmkindik beredi.
Qujattardy qaıta usyný qajettiligin boldyrmaý úshin júıe segiz memlekettik aqparattyq júıemen ıntegratsııalanǵan. Al Bas prokýratýranyń tekserýlerdi tirkeý júıesimen ıntegratsııalaý jumystary aıaqtalý satysynda.
Osyǵan deıin medıtsınalyq qyzmetter jarnamasyna talap qatańdaıtyny týraly jazdyq.
