Qaǵaz óndirisine serpin: memlekettik satyp alýda jańa ereje kúshine enedi
ASTANA. KAZINFORM – «Atameken» Ulttyq kásipkerler palatasy otandyq qaǵaz ónimderin óndirýshilerdi qoldaýdyń jańa kezeńi bastalǵanyn málimdedi.
UKP-nyń bastamasymen qolǵa alynǵan maqsatty sharanyń sátti nátıjesinen keıin, QR Úkimetiniń 2025 jylǵy 7 qazandaǵy № 824 Qaýlysymen memlekettik satyp alý kezinde ulttyq rejımnen alyp tastaý sharasy bekitildi.
— Eger buǵan deıin bul shara tek A3 jáne A4 formatyndaǵy keńse qaǵazyna ǵana qatysty bolsa, endi ol qaǵaz ónimderiniń keń aýqymyna qoldanylatyn bolady. Atalmysh Qaýly 2025 jyldyń 28 qazanynan bastap kúshine enedi jáne eki jyl boıy qoldanysta bolady. Qujatqa sáıkes, ulttyq rejımnen alyp tastaý qaǵaz ónimderi salasyndaǵy shetelden shyqqan barlyq taýarlardy (Qazaqstanda óndirilmeıtin taýarlardy qospaǵanda) memlekettik satyp alý kezinde belgilenedi. Memlekettik satyp alýǵa tek «Taýarlar, jumystar jáne qyzmetterdiń otandyq óndirýshileriniń tizilimine» engizilgen jeke jáne zańdy tulǵalar qatysa alady, — delingen habarlamada.
Palatanyń málimetinshe, bul sheshim bıznestiń, atap aıtqanda UKP-nyń bastamasymen 2023 jyly qolǵa alynǵan jumystyń qısyndy jalǵasy boldy. Osy sharanyń nátıjesinde nebári bir jyldyń ishinde otandyq taýar óndirýshilerdiń óndiristik qýaty 67,3%-ǵa deıin artty.
«Qaǵaz ónimderin óndirýshiler qaýymdastyǵy» ZTB jáne JKB tóraǵasy Nurlan Zakarıanovtyń aıtýynsha, bul sharanyń jetistigi tek sandarmen ǵana emes, qoǵamdyq qabyldaýdyń ózgerýimen de ólshenedi.
— Meniń oıymsha, eń bastysy — qazaqstandyq ónimniń tanymaldylyǵy men oǵan degen senim artty. Eki jyldyń ishinde bizdiń óndirýshiler kóptegen jyldar boıy qalyptasqan kózqarasty buza aldy. Buǵan deıin barlyǵy sheteldik keńse qaǵazyn qoldanýǵa úırengen edi. Qazir kez kelgen memlekettik nemese kvazımemlekettik mekemege kirseńiz, bári qazaqstandyq qaǵazdy paıdalanyp otyr, — dedi Zakarıanov.
Kásipkerdiń aıtýynsha, keıbir kásiporyndar óz qyzmetin keńeıtip, maılyqtar, dárethana qaǵazy sııaqty ónimderdi shyǵarýǵa jáne qaǵaz óńdeıtin mashınalar satyp alýǵa kirisken. «ıAǵnı, bul salada áli de qolǵa alýǵa bolatyn kóptegen ónim bar», — dep tolyqtyrdy ol.
Óńdeý ónerkásibi departamentiniń sarapshysy Gúlmıra Qajybekovanyń aıtýynsha, «Atameken» UKP, Ónerkásip jáne qurylys mınıstrligi jáne bıznestiń úılestirilgen pozıtsııasynyń arqasynda buǵan deıin ımport basym bolǵan naryq segmentin bosatýǵa múmkindik týǵan.
«Atameken» UKP Ónerkásip jáne qurylys mınıstrligimen birlese otyryp, aldaǵy 10 jumys kúni ishinde ulttyq rejımnen alyp tastaýǵa jatatyn qaǵaz ónimderiniń naqty tizbesin bekitedi jáne otandyq taýar óndirýshilerge barynsha qoldaý kórsetý jumysyn jalǵastyrady.