Qaǵaz qujat aınalymyn avtomattandyryp, tsıfrlyq elmiz deýge bolmaıdy — Ásel Janasova

ASTANA. KAZINFORM — Memlekettik organdar ýaqytynyń 90 paıyzyn saýaldarǵa jaýap berýge emes, saraptamalyq jumystarǵa jumsaýy tıis.

Bul týraly Taldau Talks podkastynda «Qazposhta» AQ basqarma tóraǵasy Ásel Janasova aıtty.

— Qaǵaz qujat aınalymyn avtomattandyryp, tsıfrlyq elmiz deýge bolmaıdy. Biz mentaldy ózgerýge tıispiz. Iá, memlekettik qyzmetterdi avtomattandyrǵanymyz óte jaqsy. Biraq úkimet aqyldy bolýy tıis, adam barmaýy qajet. Anglııada turǵanymda eshqaıda barmaıtynmyn. Invisible Government, ıaǵnı baıqalmaıtyn úkimet únemi bolatyn. Ol siz úshin bárin isteıdi. Qandaı da bir anyqtama alý qajettigin oılamaısyz. Bosanǵannan keıin esepshot ashýǵa barýyńyz qajet. Ne úshin? Bazada bosanǵanym, balam bar ekeni kórinip tur ǵoı. Demek, avtomatty túrde esepshot ashylyp, aqsha aýdarylýy kerek, — dedi ol.

Onyń aıtýynsha, memlekettik organdar arasynda bir-birine suraý salý óte kóp. Olardy qysqartqan jón.

— Ýaqytymyzdyń 90 paıyzyn saýaldarǵa jaýap bergennen góri sol ýaqytty zııatkerlik jumysqa, saraptamaǵa jumsaýymyz qajet, — dedi Ásel Janasova.

Aıta keteıik, Taldau Talks — Senat tóraǵasy Máýlen Áshimbaev júrgizetin ashyq dıalog alańy. Onda el damýyna qatysty mańyzdy máseleler jáne Memleket basshysy júktegen mindetterdi iske asyrý joldary talqylanady. Bul jolǵy shyǵarylym Qazaqstanda tsıfrlandyrý jáne jasandy ıntelektini damytý taqyrybyna arnaldy.

Osyǵan deıin Arsen Tomskıı Qazaqstanǵa tsıfrlyq táýelsizdik jaıyn oılanýǵa keńes berdi.