Qaǵaz betinde ǵana júzege asyrylǵan tabystarǵa masattanatyn zaman kelmeske ketti – Prezıdent
«Qazirgi halyqaralyq ahýal qyrǵı-qabaq soǵystyń eń qıyn kezeńin eske túsiredi. Biraq, shegine jete býyrqanǵan, memleketter qatań sanktsııalarmen tiresken, jer júzine qandaı kesiri tıetini beımálim bolyp turǵan búgingi jaǵdaıdy adamzat buryn-sońdy kórmegen teńdessiz qıyndyq deýge ábden bolady. Sondyqtan, biz úshin kózdegen maqsattan aýytqymaýdyń, elimizdiń tutastyǵyn, jalpyulttyq birligi men tilektestigin saqtaýdyń ómirlik mańyzy bar», - dedi Qasym-Jomart Toqaev.
Prezıdent reforma jasap jatyrmyz degen ataq úshin ǵana reforma jasaýdyń qajeti joǵyn aıtty.
«Men muny birneshe ret aıttym. Biz bul ózgeristerdi jurtqa jaqsy kóriný úshin jasamaımyz. Qulaqqa jaǵymdy, biraq oryndalýy ekitalaı, kúmándi kórsetkishterge aldanbaımyz. Qaǵaz betinde ǵana júzege asyrylǵan, biraq shyndyqqa esh janaspaıtyn jalǵan tabystarǵa masattanyp otyratyn zaman kelmeske ketti. Halyqqa kópirme sóz, bos ýáde emes, kózben kórip, qolmen ustaýǵa bolatyn oń ózgerister kerek.
Biz kez kelgen máseleni ashyq aıtyp, ony sheshýdiń ońtaıly joldaryn birge izdeýimiz qajet. Ekonomıkadaǵy, saıasattaǵy jasandy monopolııalardy túbirimen joıýǵa tıispiz. Onyń ornyna ashyq ári ádil báseke ornatý óte mańyzdy. Sebebi naǵyz báseke bolǵanda ǵana halyqtyń ál-aýqaty artyp, jaǵdaıy jaqsarady», - dedi Q. Toqaev.
