Kafe, meıramhana men qonaqúıler avtorlyq quqyqtyń tsıfrlyq platformasyna qosylady
ASTANA. KAZINFORM — 2027 jylǵy 1 qańtardan bastap Qazaqstandaǵy kafe, meıramhana, saýda ortalyǵy, qonaqúı jáne basqa da bıznes sanattary zııatkerlik menshik salasyndaǵy Biryńǵaı tsıfrlyq platformaǵa kezeń-kezeńimen qosylady. Bul týraly Ortalyq kommýnıkatsııalar qyzmetinde ótken brıfıngte QR Ádilet vıtse-mınıstri Botagóz Jaqselekova aıtty.
Biryńǵaı tsıfrlyq platforma avtorlar, quqyq ıelenýshiler, olardyń quqyqtaryn basqaratyn uıymdar jáne týyndylardy paıdalanýshylar arasyndaǵy jumysty bir jerge jınaqtaıdy. Platforma arqyly shart jasasýǵa, týyndynyń qaıda jáne qalaı paıdalanylǵanyn esepke alýǵa, esep berýge, sondaı-aq avtorlarǵa tıesili syıaqyny eseptep, tóleýge bolady.
Vıtse-mınıstrdiń aıtýynsha, platformany engizý úsh kezeńge bólingen. Alǵashqy kezeń bıyl 23 qańtarda bastalyp, radıostantsııalar, telearnalar, kabeldik jáne spýtnıktik operatorlar salasyn qamtydy. Ekinshi kezeń 1 shildede bastalyp, oǵan teatrlar, fılarmonııalar men kınoteatrlar qosyldy.
— Úshinshi, eń aýqymdy kezeń 2027 jylǵy 1 qańtardan bastalyp, paıdalanýshylardyń shamamen 90%-yn — kafelerdi, meıramhanalardy, saýda ortalyqtaryn, qonaqúılerdi jáne bıznestiń basqa da sanattaryn qamtıdy, — dedi Botagóz Jaqselekova.
Qazirgi ýaqytta Biryńǵaı tsıfrlyq platformada 291 sýbekt tirkelgen. Onyń ishinde barlyq 13 quqyqtardy ujymdyq basqarý jónindegi uıym jáne 115 telearna men radıostantsııa bar.
Ekinshi kezeń aıasynda platformaǵa 63 teatr, 25 fılarmonııa jáne 53 kınoteatr tirkelgen. Týyndylar tizilimine 157 myńnan astam obekt engizilip, bazada 15 myńǵa jýyq quqyq ıelenýshi bar.
Biryńǵaı tsıfrlyq platformanyń 2027 jylǵy 1 qańtarǵa qaraı tolyq rejımde jumys isteýin qamtamasyz etý josparlanyp otyr.
Aıta keteıik, buǵan deıin avtorlyq quqyq salasyndaǵy Biryńǵaı tsıfrlyq platforma qalaı jumys isteıtini jóninde jazdyq.
