QAES pen AEHA atom elektr stantsııasyn salýǵa tájirıbelik daıyndyq máselelerin talqylady
ASTANA. KAZINFORM – «QAES» JShS Bas dırektory Ernat Berdiǵulov Vena qalasynda ótken MAGATE-niń 69-shy Bas konferentsııasyna Atom energııasy agenttiginiń tóraǵasy Almasadam Sátqalıev bastaǵan Qazaqstan delegatsııasynyń quramynda qatysty.
Konferentsııa aıasynda delegatsııa músheleri ıadrolyq saladaǵy jetekshi halyqaralyq uıymdar men kompanııalardyń ókilderimen birqatar ekijaqty kezdesý ótkizdi. Atap aıtqanda, AEHA bas dırektory Rafael Grossı, agenttiktiń bas dırektorynyń orynbasary Mıhaıl Chýdakov, EDF dırektorlar keńesiniń tóraǵasy Bernar Fontana, World Nuclear Exhibition prezıdenti Sılvııa Bermann jáne energetıka men dıplomatııalyq qaýymdastyqtyń basqa da ókilderimen kelissózder júrgizildi.
Sondaı-aq Ernat Berdiǵulov AEHA-nyń Qazaqstanmen tehnıkalyq yntymaqtastyq baǵdarlamalaryna jaýapty jetekshisi Sıbel Ýnlýmen kezdesý ótkizdi.
Kezdesý barysynda atom elektr stantsııasyn salýǵa daıyndyq jáne tehnıkalyq yntymaqtastyq jobalaryn iske asyrý máseleleri qaraldy. Taraptar sondaı-aq Qazaqstanda AEHA tarapynan uıymdastyrylatyn mamandandyrylǵan semınarlar, AEHA-nyń mindetti mıssııalaryn (INIR, IRRS jáne t.b.) ótkizý, sondaı-aq qazaqstandyq mamandarǵa arnalǵan oqytý jáne taǵylymdamadan ótý baǵdarlamalarynyń mańyzdylyǵyn atap ótti. Sonymen qatar AEHA tarapynan kórsetiletin saraptamalyq jáne tehnıkalyq qoldaý túrleri, sondaı-aq Qazaqstannyń kórshiles elder aldyndaǵy agenttik talaptaryna sáıkes halyqaralyq mindettemeleri talqylandy.
Ernat Berdiǵulovtyń aıtýynsha, AEHA-men yntymaqtastyq elimiz úshin strategııalyq mańyzǵa ıe. Bul yntymaqtastyq negizgi jobalardy júzege asyrýǵa qajetti qoldaýdy qamtamasyz etip, atom energetıkasy salasyndaǵy qazaqstandyq mamandardyń jańa býynyn daıarlaýǵa turaqty negiz qalyptastyrady.
– Aldaǵy ýaqytta biz AEHA-men birlesip, atom elektr stantsııalarynyń bolashaq ıeleri men operatorlarynyń jaýapkershilikterine, sondaı-aq Qazaqstanda atom energetıkasyn damytý úshin kadrlar daıarlaý máselelerine arnalǵan birqatar tehnıkalyq semınar ótkizýdi josparlap otyrmyz. Mundaı kelissózder halyqaralyq yntymaqtastyqtyń jańa múmkindikterin asha otyryp, atom energetıkasynyń bolashaǵyn aıqyndaıtyn jáne jahandyq qaýipsizdikke úles qosatyn ortaq sheshimder qabyldaýǵa jol ashady, – dep atap ótti Ernat Berdiǵulov.
Aıta keteıik, AEHA Qazaqstanǵa atom elektr stantsııasyn salýdyń barlyq kezeńinde qoldaý kórsetpek.
Qazaqstanda AEHA zertteý reaktorlary boıynsha halyqaralyq konferentsııasy ótýi múmkin.
AEHA Ózbekstan bıliginiń AES salý josparyna qoldaý bildirdi.
Qazaqstan AEHA-nyń 69-shy Bas konferentsııasynda atom energetıkasynyń jańa damý kezeńin jarııalady.