Qadyr ortalyǵynyń «Dala dıdary» ujymy Atyraý oblysynda óner kórsetti
ORAL. QazAqparat - «Qadyr jolymen...» jobasy aıasynda Qadyr Myrza Álı atyndaǵy mádenıet jáne óner ortalyǵy janynan qurylǵan «Dala dıdary» kóshpeli óner ujymy kórshiles Atyraý oblysyna shyǵarmashylyq saparmen jol tartty, dep habarlaıdy «QazAqparat» tilshisi.
Batysqazaqstandyqtar aldymen Mahambet aýdandyq mádenıet úıinde kontsert qoıdy. Belgili ánshi, «Eren eńbegi úshin» medaliniń ıegeri Dastan Esentemirovtyń oryndaýyndaǵy «Aqjaıyq» ənimen ashylǵan keshte Qadyr ortalyǵynyń dırektory, aqyn Baýyrjan Halıolla sóz sóılep, bıyl kóktemde bastaý alǵan jobanyń maqsatymen tanystyrdy. Aıtysker aqyn Aınabek Bısenǵalıev erdiń esimin alǵan elge jyryn arnasa, ənshi Ernar Ómirəli «Qazaqtardy sheteldik qonaqtarǵa tanystyrýdy» óz bıiginde əýeletti. Sondaı-aq ánshi-kompozıtor, «Eren eńbegi úshin» medaliniń ıegeri Jaskeleń Ǵaısaǵalıev ədettegideı el qoshemetine bólenýin bul sahnada da jalǵastyrdy. Aǵa býynnyń izine ergen Meıirhan Aıýpov, Erlan Qýanyshev, Gúlzada Ahmetova, «Іnjý» toby óner kórsetip, kesh mereıin kótere tústi.
Talantty jastar Asylanbek Shyǵyrov, Aqnur Jumaǵalıevalar Qadyr aqynnyń jyrlaryn oqydy.
Kesh tizginin ustaǵan jýrnalıst Baýyrjan Ǵubaıdýllın sahna tórinde Qadekeńniń «qaljyń qorjynyn» ashty.
«Dala dıdary» ujymynyń sapary Atyraý qalasyndaǵy Mahambet atyndaǵy teatrda jalǵasyp, Qadyr shyǵarmasyn Jumekenniń eline nasıhattaǵan ónerli top atyraýlyqtardyń da qoshemetine bólendi. Kesh shymyldyǵyn Aınabek Bısenǵalıev ashsa, dəstúrli ənniń «jiligin shaǵyp, maıyn iship» júrgen Dastan Esentemirov pen Ernar Ómiráli «Ata» ənimen eldi bir serpiltip tastady. Qadyrdyń sózderine jazylǵan basqa da ánder oryndalyp, jyrlary oqyldy. Talantty aqyn Talǵat Myqı qos qurdas Qadekeń men Tumaǵańnyń dostyǵy týraly jazylǵan óleńimen daralandy.
Kesh sońynda Atyraý oblysynyń ákimi Nurlan Noǵaev Qadyrdaı uly aqyn shyǵarmashylyǵynyń ómirsheńdigi týraly aıta kelip, jańa ujymǵa səttilik tiledi.
«Óziniń zamanynan ozyp týǵan aqyndar bolady. Olar ómirden ótkennen keıin, tipti ǵasyrdan soń jańa qyrynan baǵalanyp jatady. Qadyr aqyn kóziniń tirisinde de jalpaq eldi talantymen moıyndata bildi. Onyń týyndylary óz bıiktiginen esh ýaqytta tómendemek emes. Qadyr aǵamyz ónimdi eńbek etýdiń úlgisin kórsete bildi. Qazaq halqymen birge jasaıtyn jyrlarymen birge «Iirimi» men «Jazmyshy» arqyly qanshama adamnyń ǵumyrnamasy men shyǵarmashylyq qyrlaryn kelistirip jazdy. El aýzynda júrgen tapqyr sózderi qanshama! Búginde Oralǵa joly túsken adam Qadyr ortalyǵyna soqpaı ketpeıdi. Ondaǵy aqynnyń ózi jınaǵan 7 myńǵa jýyq kitaby, jumys ústeli, tutynǵan buıymdary únemi kóz tartyp turatyn bolady. Qadyr shyǵarmashylyǵyn nasıhattaý jumystary budan keıin de jalǵasa bermek. Elbasymyz aıtqanyndaı, rýhanı jańǵyrý degenimiz, mine, osy», dedi Nurlan Asqaruly.
«Dala dıdary» ujymy endi Atyraýdyń Jylyoı aýdanynda bolyp, óz ónerin kórsetpekshi.
