Qadyr Omarov: Bul derttiń betin tek vaktsına qaıtarady
ALMATY. QazAqparat - Medıtsına ǵylymynyń doktory, densaýlyq saqtaý júıesi ardagerleri keńesiniń tóraǵasy Qadyr Omarov vaktsınanyń mańyzy týraly aıtty, dep habarlaıdy QazAqparat tilshisi.
Medıtsına ardageriniń aıýynsha, qazir búkil álem koronavırýspen kúresip jatyr.
«Qazir koronavırýs aýrýy órship, vırýs juqtyrǵandar sany kún sanap artyp barady. Elde de, kórshi memleketterde de aýrýǵa qarsy kúreske kóp kúsh jumsalyp jatyr. Úkimet tarapynan vaktsınatsııaǵa qomaqty qarjy bólinýde. Qoǵamda bul qaterli dertpen kúresýde. Desekte, koronavırýsqa qarsy ekpe saldyryp jatqandar az. Kóp adamdy áli vaktsınatsııadan ótkizýimiz qajet», - deıdi Qadyr Omarov.
Sonymen qatar, ol bul derttiń betin tek vaktsına qaıtaratynyn jetkizdi.
«Biz kópti kórgen adambyz, 50 jyldan astam medıtsına salasynda júrmiz, kezinde vaktsına arqyly kóptegen aýrýlardy jeńgenbiz, biz indetti qalaı jeńe alatynymyzdy bilemiz. Bizde quqyq jaıly sóıleıtin, teledıdarda jáne ǵalamtorda «vaktsınany alýǵa da, almaýǵa da bolady», dep aıtatyn talaı blogerler bar. Endi, biz óz elimizge, qazaq halqyna aıtqymyz keledi: «biz vaktsına alýymyz kerek. Iıa, sizdiń vaktsına almaýǵa tolyq quqyǵyńyz bar, alaıda siz áke-shesheńizdi, balalaryńyzdy, týystaryńyzdy oılaýyńyz kerek. Vaktsına - bizdiń bolashaǵymyz, bizdiń densaýlyǵymyz» - dep qosty medıtsına ǵylymynyń doktory.
Tájirbıeli medıtsına mamany vaktsına aýrýǵa qanshalyqty tótep bere alatynyn tilge tıek etti.
«Qazirgi kúnde barlyq aýrýǵa qarsy tura alatyn vaktsına joq. Biz qazir berilip jatqan vaktsınany saldyrýmyz kerek, sebebi, ol qazirgi shtamdarǵa kúshi jetedi. Al erteńgi bolatyn ózgerister - ol bıologııa, ol tabıǵat. Múmkin eki jyldan soń jańa vaktsına jasalatyn shyǵar, biz ony bilmeımiz. Ony ýaqyt kórsetedi. Biraq búgin biz osy koronavırýsqa qarsy em alýymyz kerek. Qajet bolsa ekinshi ret alamyz. Biz talaı aýrýdy osylaı jeńgenbiz, erteńgi kúni osy aýrýdy da jeńe alamyz»,- dedi spıker.
