Qadyr qazaqtyń óleń dúnıesine, poezııa álemine qubylys bop kirgen aqyn - N. Orazalın
ALMATY. 24 qańtar. QazAqparat /Erlik Erjanuly/ - Keshe Almatyda Qazaqstannyń halyq jazýshysy, Memlekettik syılyqtyń laýreaty, aqyn Qadyr Myza Álini eske alýǵa arnalǵan «Qazaqtyń dana - Qadyry» dep atalatyn ádebı-sazdy kesh ótti.
«Qadyr aqyn 20-ǵasyrdyń búkil alasapyran oqıǵalaryn kórgen, qıyndyqtaryn bastan ótkizgen, ultyn tárbıelegen halyqtyń birtýar perzenti, uly aqyny. Qadyr aqynnyń rýhy, jany qazaqtyń ulan baıtaq aspanynda máńgi jasaıdy. Sonyń eń alǵashqy belgisi búgin Qazaqtyń Abaı atyndaǵy memlekettik opera jáne balet teatrynda ótip jatqan kesh dep baǵalaýmyz kerek», - deıdi Qazaqstan Jazýshylar odaǵynyń tóraǵasy Nurlan Orazalın.
Mádenıet jáne aqparat mınıstrligi men Almaty qalasy ákimdiginiń qoldaýymen «Qadyr Myrza Áli» qoǵamdyq qory uıymdastyrǵan bul shara aqynnyń dúnıeden ótkenine 1 jyl tolýyna oraılastyryldy. «Qadyr Myrza Áli» qoǵamdyq qorynyń dırektory Donedil Qajymovtyń aıtýynsha, olar az ýaqyttyń ishinde aqyndy ulyqtaýǵa arnalǵan birqatar is-sharaǵa uıytqy bolǵan. Atap aıtqanda Qadyr Myrza óz kózimen kóre almaı ketken 18 tomdyq shyǵarmalar jınaǵy jaryq kórip, aforızmderi kitap bop basylyp shyqqan. 200-den astam ánge mátin jazǵan aqynnyń ánin oryndaýshylardyń jeke úntaspasy shyǵarylyp, Almaty qalasy men Batys Qazaqstan oblysynda arnaıy kórmeler uıymdastyrylǵan. Eske alý keshinde aqynnyń óleńderi oqylyp, óner juldyzdarynyń oryndaýynda birqatar ánderi oryndaldy.
