Kadrlyq rezerv múshesi múgedekterge qalaı kómekteskenin aıtyp berdi
«Meniń birinshi joǵary bilimim – baǵdarlamalaýshy, ekinshi bilimim – basqarýdy uıymdastyrý menedjmenti. Startaptardy iske qosý boıynsha tájirıbem bar, kvazımemlekettik sektorda, jeke salada jumys istedim, bıznespen aınalystym. Rezervke alynǵan soń, memlekettik qyzmette ózimdi synap kórýge jáne jalpy memlekettik mehanızmniń qalaı jumys isteıtinin kórýge tamasha múmkindik týdy. Bizge túrli memlekettik organdardan jumys jóninde usynystar kelip túskende, Eńbek jáne áleýmettik qorǵaý mınıstriniń keńesshisi laýazymyna mán berdim. Munyń eki sebebi boldy. Birinshiden, áleýmettik sala – kez kelgen memlekettiń jumysyndaǵy asa mańyzdy jáne kúrdeli baǵyttardyń biri. Ekinshiden, ózimniń múgedektigim bar jáne adamdardyń óz quqyqtaryn iske asyrýda kez bolatyn umtylystary men problemalaryn ishinara túsinemin», - dedi Á. Zákıev Prezıdenttik jastar kadrlyq rezerviniń forýmynda.
Spıker keńesshi retinde óz jumysyn ótken jyldyń naýryz aıynda bastaǵanyn aıtty. Osylaısha, ol áleýmettik qyzmetter portalyn iske asyrý bóliginde qandaı jumys júrgizilgenin jetkizdi.
«Bul óte kúrdeli kezeń boldy, Úkimet úlken jumys atqardy, negizgi jumys ta umyt qalǵan joq. Maǵan tsıfrlandyrý jáne múgedektik baǵyty bekitildi. Sol kezde iri joba – múgedektigi bar adamdarǵa arnalǵan áleýmettik qyzmetter portaly iske qosyldy jáne qazir de jumys istep tur», - dep atap ótti Á. Zákıev.
Sonymen qatar, mınıstr keńesshisi áleýmettik qyzmetter portalynyń artyqshylyǵy nede ekenin túsindirdi.
«Buryn adamdarǵa protezder, baldaqtar, arbalar Memlekettik satyp alý arqyly beriletin. Biz bárin elektrondy formatqa aýystyrdyq, endi adamdar memlekettik satyp alýsyz-aq jetkizýshini ózderi tańdaı alady. Al memleket osy taýarlardyń qunyn óteıdi. Osylaısha, biz adamdarǵa ıkemdilik pen tańdaý usynamyz, taýarlardyń sapasyn arttyramyz, bul rette memlekettik satyp alýdy alyp tastaý esebinen sybaılas jemqorlyq táýekelderin de barynsha azaıtamyz», - deıdi Á. Zákıev.
Onyń aıtýynsha, portalda 350 myńnan astam paıdalanýshy tirkelgen. Qazirgi ýaqytta 100 myńnan astam tapsyrys ornalastyrylǵan.
«Keńesshi qyzmetiniń negizgi baǵyttarynyń biri – barlyq steıholderlermen qarym-qatynas jasaý. Meniń jaǵdaıymda bul – múgedektigi bar adamdar, úkimettik emes uıymdar, memlekettik organdar. Jumysty ońtaılandyrý úshin birqatar suhbat alańdaryn qurdym, áleýmettik qyzmetter portalynyń jumysyn kórsetetin YouTube arnasyn qurdym. Osy arnalar arqyly adamdardan keri baılanys alyp, problemalyq usynystardy jınaý qajet», - deıdi Ádilet Zákıev.
