Kadrlyq rezervke alynǵandardyń 80%-y túrli qyzmet atqaryp júr — Agenttik

ASTANA. KAZINFORM — Bıyl elimizde 4-shi ret Prezıdenttik jastar kadr rezervine irikteý ótedi. Osyǵan oraı QR Memlekettik qyzmet isteri agenttiginiń Astana qalasy boıynsha departamenti túsindirý jıynyn ótkizdi.

Prezıdenttik jastar kadrlyq rezervin qalyptastyrý Memleket basshysynyń bastamasymen júzege asyp keledi jáne memlekettik basqarý isine talantty, bastamashyl, jańasha oılaıtyn jastardy tartýǵa baǵyttalǵan.

— Osyǵan deıin kadrlyq rezervke úsh ret irikteý ótkizildi. Atap aıtqanda, 2019, 2021 jáne 2023 jyldary ótkizilgen irikteýge 60 myńnan astam azamat qyzyǵýshylyq tanytty. Nátıjesinde rezervke 400 adam qabyldandy (2019 jyly — 300 adam, 2021 jyly — 50 adam, 2023 jyly — 50 adam), — dep habarlady Memlekettik qyzmet isteri agenttigi.

Rezervke qabyldanǵan 400 adamnyń 318-i memlekettik organdar men ózge de uıymdarda qyzmet atqaryp júr, ıaǵnı jalpy sanynyń 80%-y jumyspen qamtylǵan.
Bıyl 1-30 maýsym aralyǵynda Prezıdenttik jastar kadrlyq rezervine tórtinshi ret irikteý ótedi jáne 50 adamdy rezervke alý josparlanǵan.

Bıylǵy irikteýde ár sala boıynsha naqty kvota belgilenedi. Kandıdattardyń birkelki sanyn qalyptastyrý úshin ár kezeńde proportsıonaldy irikteý ótkiziledi. Atap aıtqanda, irikteý 6 salalyq baǵyt boıynsha ǵana júrgiziledi.

Kandıdattardyń jasy 35-ten aspaýy kerek, joǵary bilimdi, 5 jyl eńbek ótili jáne qazaq tilin meńgerý deńgeıi V1 deńgeıinen tómen bolmaýy kerek. Іrikteýge Prezıdent taǵaıyndaǵan adamdar, saıası qyzmetshiler, «A» korpýsynyń memlekettik ákimshilik qyzmetshileri, Prezıdenttik jastar kadr rezervinde turǵan adamdar jiberilmeıdi.
Іrikteý 6 kezeńnen turady jáne maýsym-qazan aılarynda ótkiziledi. 1-30 maýsym aralyǵynda rezervke alý úshin kandıdattardyń qujattary arnaıy aqparattyq júıede onlaın qabyldanady.

Ekinshi kezeńde — 2-10 tamyz kúnderi mátindik jáne sandyq aqparatpen jumys isteý qabiletin baǵalaý kezeńi ótedi. Talapqa saı keletin barlyq kandıdattyń mátindik aqparatpen jumys isteý qabileti baǵalanady. Bul rette sandyq testileýge ár salalyq baǵyt boıynsha eń kóp ball jınaǵan kandıdattardyń 50%-y jiberiledi.

Testileý qorytyndysy boıynsha kelesi kezeńge — sıtýatsııalyq tapsyrmalardy sheshýge úzdik nátıjege qol jetkizgen 600 kandıdat (onyń ishinde árbir salalyq baǵyt boıynsha 100-den aspaıtyn kandıdat) jiberiledi.

Úshinshi kezeń — sıtýatsııalyq tapsyrmalardy sheshý kezeńi (16–17 tamyz). Ol kandıdattardyń tańdaǵan salalyq baǵyttaryna baılanysty naqty problemalardy sheshý boıynsha usynystaryn baǵalaýǵa baǵyttalǵan. Bul kezeń onlaın-rejımde esse jazý formatynda ótedi. Nátıjesinde, 22 tamyz ben 3 qazan aralyǵynda ótetin kandıdattardyń quzyretterin baǵalaý kezeńine 300 kandıdat ótedi.

Tórtinshi kezeń baǵalaýdyń eki blogynan turady: assessment-ortalyq jáne quzyretter boıynsha suhbat. Assessment-ortalyq (22–28 tamyz) Memlekettik basqarý akademııasynda offlaın formatta ótedi. Ol kandıdattardyń boıyndaǵy minez-qulyq ındıkatorlarynyń jıyntyǵy arqyly qajetti quzyretterdi (kóshbasshylyq, taldaý jáne máselelerdi sheshý, qyzmetti basqarý, sendire bilý, proaktıvtilik) baǵalaýǵa baǵyttalǵan.

Assessment-ortalyqtan ótý qorytyndysy boıynsha 200 qatysýshy quzyretter boıynsha suhbattan ótýge jiberiledi. Quzyretter boıynsha suhbat blogy kásibı HR-menedjerlerdi tarta otyryp, 23–28 qyrkúıek kúnderi ótkiziledi. Suhbat kandıdattardyń ishki ýájdemesin jáne qundylyq baǵdarlaryn aıqyndaıtyn quzyretterdi anyqtaýǵa baǵyttalady. Onyń qorytyndysy boıynsha kelesi kezeńge 150 qatysýshy jiberiledi.

Besinshi kezeń — sarapshylyq komıssııamen suhbat 8–15 qazan aralyǵynda ótedi. Onyń qorytyndysy boıynsha Ulttyq komıssııa otyrysyna 100-den aspaıtyn kandıdat usynylady.

Altynshy kezeńde rezervke úzdik 50 kandıdatty qabyldaý úshin 25 qazanǵa deıin Ulttyq komıssııa otyrysy ótip, qazan aıynyń sońyna deıin sheshim shyǵarylady.

Aıta keteıik, buǵan deıin Prezıdenttik jastar kadr rezervine úmitkerlerdi bıyl qandaı synaq kútip turǵanyn jazǵanbyz.