Kadrlarǵa suranysty anyqtaý jaýapkershiligin memlekettik organdar arasynda bólip tastaý qajet - Bilim mınıstri
TANA. 18 qarasha. QazAqparat /Gúlmıra Alıakparova/ - QR Bilim jáne ǵylym mınıstri Baqytjan Jumaǵulov, qazaqstandyq naryqtaǵy kadrlarǵa degen boljamdy suranysty anyqtaý jaýapkershiligin memlekettik organdar arasynda bólip tastaýdy usyndy.
«Mysalǵa, Eńbek mınıstrligi ekonomıkanyń kadrlarǵa suranysyn boljamdaýdyń biryńǵaı ádisnamasyn ázirleýdi óz jaýapkershiligine ala alady. Indýstrııa mınıstrligi - ındýstrıaldy jobalar sheńberindegi kadrlarǵa degen suranysty, Ekonomıka mınıstrligi - tıisti baǵdarlamalar sheńberinde», - dep atap ótti mınıstr búgin Astanada ótip jatqan «Kásiptik bilim berý jáne bıznes: Áriptester suhbaty» atty ІІІ Halyqaralyq forýmda sóılegen sózinde.
B.Jumaǵulovtyń aıtýynsha, óz kezeginde Statıstıka agenttigi kásiporyndardyń kadrlarǵa degen suranysyn, praktıkany uıymdastyrýdy, jas mamandardy jumyspen qamtý úshin bos jumys oryndardyń sany jáne oqý oryndarymen jasalǵan kelisimsharttar sany týraly málimetterge jaýap bere alady. Al jergilikti organdarǵa óńirlik jáne salalyq keńester sheshimderiniń negizinde - kadrlardy daıarlaýǵa arnalǵan memlekettik tapsyrysty qalyptastyrýdy júkteýge bolady.
Bıznes ókilderin B.Jumaǵulov, tehnıkalyq jáne kásiptik bilimdi basqarýǵa jáne qamqorlyq keńesterdiń jumysyna belsendi aralasýǵa shaqyrdy.
