Kadrlardy kimge jáne ne úshin daıyndaıtyndyǵymyzdy bilýimiz kerek - vıtse-premer

NUR-SULTAN. QazAqparat - Bilikti mamandar daıyndaý jumysy kásiporyndardan bastalýy tıis. Bul týraly búgin Salalyq kásiptik standarttardy ázirleý máseleleri boıynsha biliktilik jónindegi ulttyq keńes otyrysynda QR Premer-Mınıstriniń orynbasary Berdibek Saparbaev aıtty, dep habarlaıdy QazAqparat tilshisi.

«Biz kadrlardy kimge jáne ne úshin daıyndaıtyndyǵymyzdy bilýimiz qajet. Ol kadrlar eńbek naryǵynda talap etilgen bolýy tıis. Eń bastysy erteń olardy jumys isteıtindigin kórsetýimiz kerek. Sondyqtan Zeınetaqy tóleý jónindegi memlekettik ortalyq arqyly jumysqa ornalasýdy engizdik», - dedi vıtse-premer.

Osy rette ol kadrlardy daıyndaý jumysyn kásiporyndarmen birlese otyryp qolǵa alý kerektigine nazar aýdardy.

«Kásiporyndardan bastaý qajet. Kásiporyndar shyndyǵyna kelgende endi 10 jyldan keıin qandaı mamandar qajet ekendigin, kimdi daıyndaý kerektigin biledi. Soǵan saı mamandarǵa bizdiń oqý oryndaryna tapsyrys berilýi tıis. Sol kezde bizge qajetti daǵdysy, quzireti, kásibıligi bar mamandar bolady», - dedi B.Saparbaev.