Kadrlardy daıarlaýdyń biryńǵaı memlekettik saıasatyn ázirleýge bıznes qaýymdastyq teń aralasýy qajet - BǴM
ASTANA. 28 qarasha. QazAqparat - Bıznes, memleket jáne kolledjder áriptestiginiń ornyqty quqyqtyq jáne ekonomıkalyq tetikteri qajet. Búgin Astanada «Kásibı bilim jáne bıznes: áriptester dıalogy» atty V halyqaralyq forýmynda QR Bilim jáne ǵylym vıtse-mınıstri Esenǵazy Imanǵalıev osylaı dedi.
«Kadrlardy daıarlaýdyń biryńǵaı memlekettik saıasatyn ázirleý úderisin birlesip bekitý qajet. Munda barlyq taraptar, barlyq kezeńderde sheshim qabyldaýǵa teń qatysýy kerek. Bul úshin barlyq taraptardyń múddelerin, mindetterin jáne jaýapkershilikterin aıqyndaý qajet. Osyǵan oraı adamı resýrstardy damytý salasynda memlekettik-jekemenshik seriktestik tujyrymdamasynyń jobasyn usynamyz», - deıdi E.Imanǵalıev.
Onyń aıtýynsha, bul tujyrymdama bekitilgen jaǵdaıda kadrlyq qajettilikterdi boljaý júıesin jolǵa qoıýǵa septigin tıgizbek.
«Bıznes, memleket jáne kolledjder áriptestiginiń ornyqty quqyqtyq jáne ekonomıkalyq tetikteri qajet. Osyǵan baılanysty mınıstrlik tehnıkalyq jáne kásiptik bilim strategııasyn ázirledi», - dep atap ótti vıtse-mınıstr. Strategııada kórsetilgenindeı, elimizde kásiptik bilim berý klasterin qurý kózdelýde.
