Kadrlar sapasy men bilim berý sapasy ulttyq qaýipsizdik strategııasynyń eleýli bóligi retinde qarastyrylýy tıis - D.Nazarbaeva
ASTANA. QazAqparat - Kadrlardyń sapasy, bilim berý sapasy búgingi kúni ulttyq qaýipsizdik strategııasynyń eleýli bóligi retinde qarastyrylýy tıis. Bul týraly búgin QR Parlamenti Májilisi Tóraǵasynyń orynbasary Darıǵa Nazarbaeva aıtty.
«Qazirgi álemde bilim berý jáne ekonomıka úshin kadrlar daıarlaý máseleleri memleketterdiń básekege qabilettiliginiń asa mańyzdy faktoryna aınaldy. Kadrlar bárin sheship qana qoımaıdy. Kadrlardyń sapasy, bilim berý sapasy búgingi kúni ulttyq qaýipsizdik strategııasynyń eleýli bóligi retinde qarastyrylýy tıis», - dedi ol «Tehnıkalyq jáne kásiptik, joǵary bilim berý júıesinde ekonomıka salalary úshin kadrlar daıarlaýdyń sapasy men perspektıvalary týraly» parlamenttik tyńdaý barysynda.
Ol elimizdiń aldyna 2050 jyly álemniń eń damyǵan otyz eliniń qataryna kirý maqsatyn qoıǵandyǵyn, al osy ambıtsııaly maqsatqa qol jetkizýdiń alǵashqy ári basty sharty adamı kapıtaldy damytý ekendigin basa aıtty.
«Damyǵan eldiń bári de ǵylymǵa ıek artady. Onda qyzmet kórsetý sektory basym, eńbek ónimdiligi joǵary bolady. Ǵylymı bilim men ónerkásiptiń joǵary tehnologııalyq sektory ekonomıkalyq ósimdi qamtamasyz etýde negizgi ról atqarady. Qazaqstan taıaýdaǵy on jyl ishinde óz damýynda sapaly sekiris jasap qana qoımaýy kerek. Elimizge óskeleń jáne bárin qamtıtyn jańǵyrtý isi de qajet. Prezıdentimiz memleketimiz ben ultymyzdyń maqsattary men mindetterin naq osylaı tujyrymdap berdi. Búgingi osy parlamenttik tyńdaýda aldaǵy 10, 15, 20 jylǵa arnalǵan bilim berý men ekonomıka úshin kadrlar daıarlaý júıesiniń strategııasy týraly bilikti de kásibı áńgime bolýy tıis dep sanaımyn», - dedi D.Nazarbaeva.
