Kadr saıasaty jónindegi ulttyq jáne óńirlik komıssııalar qurylady - Á. Báımenov
ASTANA. 7 qarasha. QazAqparat - Aldaǵy ýaqytta kadr saıasaty jónindegi ulttyq jáne óńirlik komıssııalar qurylady.
Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasyna baılanysty baıandaǵan QR Memlekettik qyzmet isteri agenttigi tóraǵasy Álıhan Báımenov osylaı málim etti.
«Memleket basshysy «komandalyq kóshý» atalatyn tájirıbeni toqtatý, konkýrstan tys aýysý arqyly kadrlardy taǵaıyndaýdy qysqartý jóninde birneshe tapsyrmalar bergen bolatyn. Osyǵan baılanysty zań jobasynda konkýrstan tys taǵaıyndaý múmkindigin meılinshe azaıtý kózdeledi. Aýysý tártibimen taǵaıyndaý tek memlekettik organnyń aıasynda júrgizilip, basqa memlekettik organdarǵa aýysý Elbasy belgilegen jaǵdaılarda ǵana júzege asatyn bolady», - deıdi Á. Báımenov.
Tóraǵanyń aıtýynsha, zań jobasynda memlekettik ákimshilik laýazymdarǵa zańsyz taǵaıyndaý, zańsyz jaza qoldaný, konkýrs ótkizý tártibin buzý sekildi tártiptik buzýshylyq quramdary belgilengen. Buǵan sáıkes, zańsyz kadrlyq sheshimderi úshin laýazymdy tulǵanyń jaýapkershiligi qarastyrylady.
«Zań jobasy aıasynda qurylatyndyǵy qarastyrylǵan «A» korpýsy QR Prezıdenti aıqyndaıtyn kadr rezervine irikteý jáne konkýrstyq irikteýdiń erekshe tártibi, sondaı-aq arnaıy biliktilik talaptary kózdelgen memlekettik deńgeıdegi ákimshilik laýazymdar bolyp tabylady. Bundaı arnaıy basqarýshylyq korpýs 30-dan astam damyǵan elderde bar. Atalǵan elderde mundaı laýazymdarǵa úmitkerlerge arnaıy irikteý rásimi, arnaıy oqý kýrstarynan ótý talaptary qarastyrylǵan», - deıdi Álıhan Báımenov. Onyń sózine qaraǵanda, zań jobasy qabyldanǵan soń kadr saıasaty jónindegi ulttyq komıssııa jáne óńirlik komıssııalar qurylatyny kózdeledi. Bul rette «A» korpýsyna irikteý, rezervke usyný osy komıssııalar sheshimine negizdelmek.
