Kadr saıasaty jónindegi ulttyq komıssııa «A» korpýsyna úmitkerlerdi irikteýdi bastady

Bul týraly búgin «Egemen Qazaqstan» gazeti jazdy.

Ulttyq komıssııa Qazaqstan Respýblıkasy Prezıdentiniń 2013 jylǵy 7 naýryzdaǵy №520 Jarlyǵymen memlekettik qyzmetshilerdiń basqarýshy «A» korpýsyn qalyptastyrý maqsatynda quryldy. Komıssııa quramyna Prezıdent Ákimshiligi Basshysynyń orynbasary Ǵ.Ábdirahymov, Premer-Mınıstrdiń orynbasary E.Orynbaev, Parlament Senaty Tóraǵasynyń orynbasary A.Sýdın, Parlament Májilisi Tóraǵasynyń orynbasary S.Dıachenko, Mem­lekettik qyzmet isteri agenttiginiń tóraǵasy A.Baımenov, Ádilet mınıstri B.Imashev, Premer-Mınıstr Keńsesiniń basshysy E.Qoshanov, Qazaqstan Respýblıkasy Prezıdentiniń keńesshisi - Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymy G.Ábdiqalyqova kiredi. Ulttyq komıssııanyń hatshysy - Prezıdent Ákimshiligi Memlekettik qyzmet jáne kadr saıasaty bóliminiń meńgerýshisi M.Dáýeshov.

Memleket basshysynyń «Qazaqstan-2050» Strategııasy - qalyptasqan memlekettiń jańa saıası baǵyty» atty Qazaqstan halqyna Joldaýyna sáıkes elimizde memlekettik saıasattyń naqty baǵyttaryn iske asyrýǵa jaýapty kásibı basqarýshylardyń múlde jańa toby - «A» korpýsy jasaqtalatyn bolady. Memleket basshysynyń tapsyrmasyna sáıkes bıylǵy 1 shildege deıin basqarýshylyq korpýsty qatań irikteý jáne jasaqtaý qajet. Bul jumystar búginnen bastaldy.

Ulttyq komıssııa otyrysynda birqatar ishki qujattar, sonyń ishinde jumys jospary, kandıdattardy irikteý tártibi qabyldandy, sondaı-aq irikteýdi júrgizý týraly habarlandyrýdy respýblıkalyq buqaralyq aqparat quraldarynda osy aptada jarııalaý týraly tapsyrma berildi.

Sonymen qatar, memlekettik basqarýdyń básekege qabiletti­liginiń ósýi jáne barlyq mem­lekettik apparattyń tıimdiligin arttyrý merıtokratııa, transparent­tilik, nátıjelilik jáne qo­ǵamǵa eseptilik qaǵıdattaryna negizdeletin bolady.