Kadr rezervine engender óz qarym-qabiletin kórsetetin bolady – Aslanbek Ibasov
-Bastapqyda bul konkýrsqa sheteldik dıplomy bar jáne joǵary laýazymda júrgen jastar ǵana qatysa alatyndaı kóringen, - deıdi ol.
Shyn mánisinde olaı emes eken. Ótinishimdi berip, 13 myńnan astam kandıdatpen birge biraz synaqtan ótkennen keıin barlyǵynyń múmkindikteri birdeı ekendigine kózim jetti. Talantty da isker jastardy iriktep, memlekettik basqarý isine qosý arqyly el men qoǵam ómirine yqpal etýdiń bul da bir joly dep bilemin.
-Aslanbek Qabdýloqasuly, kadr rezervi jastarǵa ne beredi dep oılaısyń?
-Muny ashyq ıdeıalar men ınnovatsııalardyń ortalyǵy deýge bolady. Rezervke ilingen jastar barlyq mańyzdy baǵyttar boıynsha memlekettik apparatty edáýir nyǵaıtyp, osy bastamanyń tıimdiligin kóp uzamaı kóretin bolarmyz dep oılaımyn.
-Memleket basqarý isine jastar qandaı daıyndyqpen barýy, nendeı qasıetterimen erekshelenýi tıis?
-Birinshiden, memlekettik qyzmette tártip erekshe mán-mańyzǵa ıe. Sondaı-aq tanym-túsinigińdi keńeıte túsý úshin óz-ózińdi únemi damytyp, tynymsyz izdený, eńbektený kerek-aq.
Qazirgi tańda elimizdiń jan-jaqty damýy úshin memlekettik basqarý isine aralasqan jastar osy zamanǵy talaptarǵa saı bolyp, jańasha sheshim qabyldaı bilýi tıis. Bul rette ómir synynan ótken dástúrli is-tájirıbelerdi umytýǵa bolmaıdy. Ataqty qolbasshy ári jazýshy Baýyrjan Momyshulynyń atap ótkenindeı, halyqtyń izgi dástúri – bizdiń eń asyl muramyz. Jastar osy halyqtyq rýhta tárbıelense, alar bıikteri men asýlary alasarmaıdy.
-Aslanbek, qazir qandaı qyzmet atqaryp júrsiń, bolashaqtaǵy arman-maqsattaryń jóninde aıta ketseń?
-Kúni búgin Bórli aýdany sáýlet, qala qurylysy jáne qurylys bóliminiń basshysy qyzmetin atqarýdamyn. Aqsaı qalasynda turyp jatyrmyn. Aldaǵy ýaqytta bilim-biligimdi jetildirip, tájirıbemdi molaıta otyryp, óz óńirimniń, elimizdiń aldynda turǵan maqsat-mindetterdi oryndaýǵa óz úlesimdi qossam ba deımin.
