Kádirbek Segizbaı, jazýshy: Otan ózimizge kerek

NUR-SULTAN. QazAqparat- Sońǵy kúnderde elimizde adam qııalyna da kirmegen oqıǵalar oryn alýda. Belgili bola bastaǵanyndaı, shetelderde arnaıy daıyndyqtan ótken sodyrlar qarý-jaraqpen elimizge kirip alyp, kóptegen óńirlerde bir mezgilde kádimgideı maıdan uıymdastyrdy.

Qazaqstannyń 30 jylda jetken jetistigin kóre almaǵan ishki jáne syrtqy jaýlar osyndaı áreketke bardy. Qandaı sebepti jeleý etse de mundaı qylmys aqtaýǵa kelmeıdi. Memleket basshysy Qasym-Jomart Kemeluly Toqaev der kezinde batyl sheshim qabyldap, elimizdi, táýelsizdigimizdi aman alyp qala bildi. Ókinishke oraı, batystaǵy keıbir uıymdar balańdy talaǵan ıtti óltirseń de, janýarlarǵa qatygezdik tanytty dep baǵalaıdy. Qarýmen elge kirip beıbit adamdarǵa oq atqan adamdarmen kelissóz júrgizýdi usynady. Prezıdent aıtqandaı, «sodyrlarmen qandaı kelissóz bolýy múmkin?». Prezıdenttiń el tynyshtyǵy men táýelsizdigine qaýip tóngen shaqta Ujymdyq qaýipsizdik sharttary uıymyna múshe memleketter basshylarynan kómek suraýy oryndy dep oılaımyn. Terrorızmge qarsy operatsııa barysynda qaza tapqan áskerılerdi Alla rahymyna bólesin! Olar óz otanyn qorǵaý jolynda sheıit boldy. 10 qańtardy jalpyulttyq aza tutý kúni dep belgileý – sol bozdaqtar rýhyna halyqtyń, memlekettiń qurmetin bildiredi. Memleket ózimizge ǵana kerek. Sondyqtan, jastarǵa aıtarym, arandatýlarǵa ermeı, ult úshin, memleket úshin qyzmet etý qajet! Qazir qalany qalyń tuman basyp tur. Degenmen tuman seıilip, kún shyǵady. Syn saǵattary da ótip, jaıdarly kezeńge de jetemiz. Bul úshin Prezıdent aınalasyna judyryqtaı jumylýǵa tıispiz.