Kádirbek Segizbaı: Búgingi synaqqa shydap bersek, erteń jaqsylyq bolary sózsiz
NUR-SULTAN. QazAqparat – Osy qysyltaıań shaqtan halyq bolyp shydap ótsek, arty jaqsylyqqa ulasary daýsyz. Jasy seksenge taıap qalǵan jazýshy, Qazaqstannyń eńbek sińirgen qaıratkeri Kádirbek Segizbaı el ishinde taraǵan indet qateri kezinde osyndaı pikir bildirip, eldi sabyrǵa shaqyrdy, dep habarlaıdy QazAqparat tilshisi.
«Bul adamnan kelgen synaq pa, álde Alladan kelgen synaq pa – jip taǵyp bile almaımyz. Qazir qazbalap oqyp, kóre berseń «jer betinde adamdar kóbeıip ketti, qaıtsek azaıtamyz» degen áńgimelerdiń de sheti shyǵady. Alla saqtasyn. Ekinshi jaǵynan muny adam jasady dep oılaı almaımyz. Bul – jer betine kelgen synaqtyń bir úlken túri. Ásirese mektepke baryp, oıyn oınap júrgen jas balalarǵa qıyndaý tıip otyrǵany ras. Qalaı bolǵanda da búgin bala-shaǵa, kári-jas bolyp, buǵyp úıde otyrmyz. Degenmen Allanyń peıili keń. Amandyq bolsa bul indetten de qutylarmyz. Túbi bir jaqsylyq bolar dep oılaımyz», - deıdi jazýshy QazAqparat tilshisine.
Kádirbek Segizbaı saǵat saıyn teledıdarǵa úńilip, qurbandyqtyń bolmaýyn tilep otyrǵanyn aıtady.
«Naýqastar men kisi ólimi kóbeımeı, aýyzdyqtalar dep tilep otyrmyz. Meniń eń birinshi yrza bolatynym – medıtsına men polıtsııa qyzmetkerleri kún-tún demeı, halyqtyń qorǵany bolyp tur ǵoı. Olardy túsinbeıtin, qashyp-pysyp qaladan kirip jatqandar da bar. Qalaı bolǵanda da olardy durystap jazalaý kerek! Óıtkeni ondaı adam ózi ǵana aýyryp qoımaı, aǵaıyny men týǵan-týystaryna, kerek bolsa búkil halyqqa qaýip tóndiredi», - deıdi ol.
Jazýshy «jut jeti aǵaıyndy» degendeı indettiń taralýymen birge el ekonomıkasy ıek artyp otyrǵanyn munaı baǵasynyń quldyraýyna qatysty da pikirin bildirdi.
«Koronavırýspen birge alpaýyt memleketterdiń bir-birimen kelise almaýy da álemdik ekonomıkaǵa qalaı áser etip jatqanyn oqyp, kórip, bilip otyrsyzdar. Bul jaǵdaı bizdiń eldiń kirisin meılinshe azaıtyp otyr. Buǵan da tózý kerek. Qazaq halqy ne kórmegen?! Bastan talaı-talaı qıynshylyqtardy ótkergen, «myń ólip, myń tirilgen» dep Juban aǵamyz aıtqandaı asharshylyq pen joqshylyqty da kórgen elmiz. Jerdiń astyndaǵy qazynaǵa qaraǵanda jerdiń ústindegi qazynaǵa - ǵasyrlar boıy babalarymyz jolǵa qoıǵan aýyl sharýashylyǵyna durystap kóńil bólsek deımin. Azyq-túliktiń azaıýy ázirge sezilip turǵan joq. Qorymyz bar dep jatyr. Halyqqa qajetti úles berilip, dárigerlerge kóterme aqy tabystalýda. Osynyń bári de der kezinde jasalyp jatqan sharýa dep oılaımyn. Ásirese polıtsııa qyzmetkerleriniń uıqy-kúlki kórmeı, qala shetin kúzetip, kóshelerdi aralap júrgeniniń bári – halyq úshin jasap jatqan qamqorlyq dep oılaımyn», - dedi Kádirbek Segizbaı.
Aqsaqal sóz sońynda halyqqa sózin arnady.
«Bul synaqqa da shydarmyz. Seksenge taıap qalǵan adam retinde halyqqa aıtarym: qaı ýaqytta bolsyn úıde otyryp, osy qysyltaıań shaqqa shydap ótsek, barlyq jaqsylyq artynan bolar dep oılaımyn. Halqymyz aman, jurtymyz tynysh bolsyn», - dep túıdi jazýshy.
Aıta keteıik, keshe Prezıdent Qasym-Jomart Toqaev respýblıkalyq telearnalar efırinen málimdeme jasaǵan bolatyn.
Foto: adebiportal.kz
