Qadir túninde Astana meshitteri 8 myńnan astam jamaǵatqa aýyzashar men sáresi dastarhandaryn jaıady
ASTANA. 1 tamyz. QazAqparat - Qadir túninde Astana meshitterinde 8 myńnan astam jamaǵatqa aýyzashar men sáresi dastarhany jaıylady. Bul týraly búgin Astanada ótken baspasóz máslıhatynda Astana qalasynyń bas ımamy Qalıjan Zańqoev málim etti.
Onyń aıtýynsha, tamyzdyń 3-nen 4-ne qaraǵan qasıetti Qadir túnin kútýge kelgen astanalyq jamaǵatqa "Nur Astana" ortalyq meshitinde 300 kisige aýyzashar dastarhany, "Áziret Sultan" meshitinde 450 kisige aýyzashar dastarhany, "S.Ǵylmanı" meshitinde 3000 kisige aýyzashar men 3000 kisige sáresi dastarhany, "Ás-Sálam" meshitinde 200 kisige aýyzashar men 200 kisige sáresi dastarhany, "Ál-Ǵanı" meshitinde 150 kisige aýyzashar men 150 kisige sáresi dastarhany, "Tólebaı" meshitinde 100 kisige sáresi dastarhany, "Sheıh Kýnta qajy" meshitinde 300 kisige aýyzashar men 300 kásige sáresi dastarhany jaıylady. Bas ımamnyń sózine qaraǵanda, aýyzashar dastarhandary Ramazan aıy bastalǵan kúnnen bastap ótkizilýde. Oǵan elordalyq kásipkerler belsendi qoldaý kórsetip keledi.
"Ramazan aıy bastalǵaly "Nur Astana" meshitinde bir kúnde 350-450 adam aýyz ashyp ketedi. Sonyń barlyǵyn bir adam istep otyr. Ol kisi "Atymdy elge jarııa etýdiń qajeti joq, bir Alla kýá ǵoı" dep bul ıgi isti shyn nıetimen jasaýda", - deıdi Astana qalasynyń bas ımamy Qalıjan Zańqoev.
Sondaı-aq "Nur Astana" ortalyq meshitinde jáne "Áziret Sultan" , "Ás-Sálam", "Ál-ǵanı", "Sheıh Kýnta qajy" meshitterinde Quran hatym aıaqtalyp, batasy jasalady. Qalalyq ákimdiktiń qoldaýymen Ramazan aıynyń alǵashqy kúninen bastap, taraýıh namazyna kelýshilerge arnaıy avtobýstar birneshe baǵyt boıynsha qatynaýda. Bul qyzmet Qadir túni de kórsetiletin bolady.
