Qadyr Myrzalıevtiń nemeresi Qyzylordada batyrlar men bılerdiń sýretin saldy
QYZYLORDA. KAZINFORM – Qyzylordadaǵy Táýelsizdikke 25 jyl dańǵylynyń boıynda qazaqtyń batyrlary men bı-sheshenderi beınelengen kórneki kartınalar tizbegi paıda boldy.
Onyń avtory — sýretshi Muhıt Myrzalıev.
Bıyl qaladaǵy úlken dańǵyl qaıta jańǵyrtylyp jatyr. Sýret salý jobada qaralmaǵan bolsa da demeýshi esebinen kóz qýantarlyq is jasaldy.
Oǵan Almatydan aǵaıyndy sýretshiler Muhıt Myrzalıev, Gleb Aqanaev jáne Serafım Ivashının tartyldy.
— Tapsyrys berýshiniń tilegine baılanysty Jalańtós bahadúr, Baımurat, Kelmenbet, Alpamys, Buqarbaı, Qobylandy batyrlardyń sýretin saldyq. Odan bólek, grafıtı stılinde Qazybek, Áıteke jáne Tóle bıler, Qorqyt atanyń qobyz tartyp otyrǵan sáti beınelengen. Sýretti kósheden kórgen soń balalar men jastarda «bular kim?» degen suraq týyp, izdenýi múmkin. Solardyń qyzyǵyshýlyǵyn arttyrý úshin ashyq, jarqyn tústerdi paıdalandyq, — dedi Muhıt Myrzalıev.
Sýretshi jumys barysy týraly egjeı-tegjeıli aıtyp berdi.
— 200 sharshy metr aýmaq, aýqymdy jumys. Negizi eki aptadaı ýaqyt jetetin. Biraq birese qatty jel soǵyp, birese jańbyr jaýyp bóget boldy. Qosymsha qurylys ta qol baılap, jumysty qoıa turýǵa týra keldi. Sonymen joba úsh aptaǵa sozyldy. Sýret salý kezinde amerıkalyq standartqa saı keletin aerozoldi boıaý paıdalandyq. Ereksheligi, ol ystyqqa da, sýyqqa da tózimdi. Ádette zaýyt ónim sapasy úshin 5 jylǵa kepildik beredi. Biraq odan da uzaqqa shydaıtynyna jeke tájirıbemde kóz jetkizgenmin. Mysaly, Almatydaǵy ózim turatyn úıdiń qabyrǵasyndaǵy sýrettiń sol kúıi turǵanyna 12 jyldan asty, — dedi ol.
Muhıt Myrzalıevtiń qos atasy — qazaq ádebıeti men kórkemsýret óneriniń kórnekti ókilderi. Óz atasy — aqyn, Qazaqstannyń halyq jazýshysy Qadyr Myrzalıev bolsa, naǵashy atasy — keskindemeshi, Qazaqstannyń eńbek sińirgen qaıratkeri Amandos Aqanaev. Sýretshilik oǵan naǵashy jurtynan darysa kerek. Bir sózben aıtsaq, sýretshiler áýleti. Ózi — grafıtı jáne mýral óneriniń sheberi. Týyndylarynyń kóbi Almatynyń tórinde tur.
Jýyrda S. Aıtbaev atyndaǵy Qyzylorda kórkemsýret galereıasynyń qoryndaǵy kartınalardyń birine jasandy ıntellekt jan bitirdi.