Qadir keshinde oı, nıetińizdiń barshasy bir Allaǵa yqylasty bolýy kerek - naıb-múftı
ASTANA. QazAqparat - Búgin, shildeniń 13-nen 14-ne qaraǵan túni jyldyń eń qundy, eń qasıetti túni - Qadir túni bolady. Osyǵan oraı, Áziret Sultan meshitiniń bas ımamy, Qazaqstan musylmandary dinı basqarmasynyń naıb-múftıi Serikbaı qajy Oraz tilshilerge suhbat berip, jamaǵatqa óziniń úndeýin jarııa etti.
«Búgin Adamzat úshin, Musylman balasy úshin asa mańyzdy jylyna bir ret keletin, óte saýapty tún - Qadir keshi bolady. Qasıetti Quranda: «Qadir túninde Qurandy túsirdik, ıgilikte saýaby myń aıdan artyq» dep aıattarda baıan etiledi. Paıǵambarymyzdyń hadısinde Allanyń Elshisi rasýlýllah: «Qadir túni meniń úmmetime erekshe qurmetpen berilgen, óıtkeni Muhammed paıǵambarymyzdan (s.ǵ.s) aldyńǵy úmmetterde mundaı bir túnde myń aıǵa laıyqty ıgilikke keneletin haıyr men berekettiń bolmaǵandyǵy» aıtylady. Paıǵambarymyzdan aldyńǵy úmmet burynǵy paıǵambarlardyń kezindegi urpaqtyń ǵumyr súrý jasy edáýir uzyn bolady eken. Sonda Paıǵambarymyz (s.ǵ.s) óz úmmeti men ózinen keıingi urpaqtyń jasy, ǵumyry qysqa bolǵandyqtan, Allanyń qulshylyǵyna, táýbe etýge ýaqyt óte az bolyp qalatyndyǵyna ol kisi qatty ishteı tolǵanatyn, sol sátte Alladan Qurannyń osy aıaty túsip, Qadir keshi Muhammed paıǵambardyń (s.ǵ.s) úmmetterine syı retinde berilgen», - deıdi naıb-múftı.
Onyń aıtýynsha, bul túni aspan aıqara ashylyp, myńdaǵan perishteler Allanyń qudyreti boıynsha jerge túsedi.
«Allanyń elshisi paıǵambarymyzdyń hadısinde bylaı dep aıtylady: «Kimde-kim Qadir túnin shynaıy senimmen, yqylaspen, bir Allanyń rızalyǵyna bólený úshin nıetpenen, qulshylyqpen ótkizse, onyń burynǵy kúnálaryn Alla Taǵala keshiredi». Endi osyǵan ózimiz bir zer salyp, qarap kórsek. Myń aı degenimiz - ıgilikte 83 jyl sanaly ǵumyr keshken, úzilissiz, toqtaýsyz ómirin ǵıbadatpen ótkizgen adamnyń sanaly ǵumyry. Osy ıgilikti bir túnde beretin ıgilikte qandaı maǵyna jatyr. Bunyń saýabyndaǵy másele, demek, Alla Taǵala bul kúni aspan esikteri aıqara ashylyp, Allanyń ámirin oryndaıtyn perishteler jerge túsip, kisilerdiń is-amaldaryn baqylaıdy. Biz qandaı oıda júrmiz, bizdiń kóńilimizde, júregimizde turǵan dúnıelerdiń barshasy - Allaǵa aıan», - dep atap ótti bas ımam.
Jasyryn emes, adamdardyń bir bóligi Qadir túnin qalaı ótkizý kerektigin tolyq bilmeıdi. Osyǵan baılanysty Serikbaı qajy Oraz, osy túni jasalatyn is-amaldarǵa da toqtaldy.
«Qadir túnin biz qalaı ótkizýimiz kerek?! Muhammed paıǵambarymyz (s.ǵ.s) Ramazan aıynyń sońǵy 10 kúnin erekshe, elden oqshaýlanyp, qulshylyqta ótkizetini jaıynda Aısha anamyzdan rıýaıat etilgen hadısi bar. Onda: «O, Allanyń elshisi, Qadir túninde qandaı duǵalardy jasaǵanym abzal bolady» dep surady. Sonda Aısha anamyz: «Ýa, Alla, Sen tym keshirimdisiń! Keshirgendi, jarylqaǵandy jaqsy kóresiń! Bizdiń kúnálarymyzdy ǵafý etip, osy Qadir túniniń qurmetine keshire gór!» degen duǵany jasaý kerek degen eken», - dedi qajy.
Onyń sózine qaraǵanda, Alla Taǵala adamzatqa osyndaı ıgilikti bergen Qasıetti Qurannyń búgingi sońǵy duǵasy osy Qadir túnine sáıkes kelip otyr.
«Sondyqtan jamaǵatymyzdyń osy keshte ýaqyl, oı, nıetińizdiń barshasy bir Allaǵa yqylasty bolýy kerek. Úıde ótkizýge de bolady. Meshitke barý shart emes. Eń bastysy - osy túnde basqa dúnıáýı tirshiliktiń barshasyn bir sátke tárk etip, jan-dúnıeńiz Allanyń qulshylyǵymen baılanysyp turýy kerek. Allany zikir etýi kerek. Osynsha sheksiz qudyrettiń ıesi bolǵan, bizdiń aqyl-parasatymyz da jetpeıtin tirshilikke bir sát kóz júgirtip jáne ózimizdiń júregimizge tynyshtyq berip, ımandy kúsheıtýimiz kerek eken. Qadir túninde ótken oqylmaı qalǵan namazdar, ótken áttegen-aı tirshiliktegi qandaı da bir pendeshilikterimizdi, qatelikterimizdi zerdeleı otyryp, Alladan sodan táýbe tileıtin bolsaq, Alla sol táýbelerimizdi, duǵalarymyzdy qabyl etedi»,- dep jalǵady S.Oraz.
«Qadir degen sózdi bizdiń halqymyz da erekshe qurmetteıdi. Bardyń qadiri, Allanyń bergen jaqsylyq-ıgiliktiń qadiri. Adamzat degenniń ózi umytshaq keledi. Basyndaǵy bolǵan qıyndyqty da áp-sátte umytyp ketemiz, bolyp turǵan jaqsylyqtyń da qadirin bilmeı umytyp jatamyz. Bul Qadir - sol Allanyń bergen ıgilikterine qadirin jasap, saraptaı otyryp, bolashaqqa jaqsy úmit etý. Bolashaǵym jarqyn bolsyn, januıam aman bolsyn, Allam baqytqa bólep, qandaı oı-maqsattarym bolsa, oryndalsyn degen tilek-nıet bolsa, ol osy keshte Inshallah Alla qabyl etip, oryndalady, nıetter qabyl bolady. Búgingi sátti paıdalana otyryp, jalpy Qazaqstan musylmandar qaýymyn Qasıetti Ramazan aıyndaǵy Quran túsken Qadir keshimen, osy Qadir túninde Allanyń erekshe meıirimge bólegen, keshirim men raqym keshimen shyn júrekten quttyqtaımyn! Elimizge, jurtymyzǵa amandyq bersin! Qadir túnindegi qulshylyqtarymyz qabyl bolsyn! Muratymyz asyl bolsyn, keler jyly osyndaı jaqsy aı, jaqsy kúnderde aman-esen jete berýdi Alla barshamyzǵa násip etsin!», - dep túıdi sózin naıb-múftı.
