«KADEX» kórmesi arqasynda birneshe áskerı kásiporyn quryldy - QR Qorǵanys mınıstrligi
Bul týraly «KADEX-2012» qarý-jaraq jáne áskerı tehnıkanyń II Halyqaralyq kórmesine oraı Astanada ótken baspasóz máslıhatynda QR Qorǵanys vıtse-mınıstri Talǵat Janjúmenov málim etti.
Onyń aıtýynsha, qarý-jaraq pen áskerı tehnıkanyń «KADEX» atty halyqaralyq kórmesi bastalǵaly beri Qorǵanys mınıstrliginiń ókiletti organy - «Qazspetseksport» kásiporny sheteldik kompanııalarmen 1,5 mlrd. teńgege 20-ǵa jýyq kelisimshart jasasty. «Osynyń arqasynda búginde el aýmaǵynda birneshe birlesken kásiporyn ashylyp, jumys istep jatyr. Olardyń ishinde elektrondy-optıkalyq quraldar óndiretin «Qazaqstan Aselsan Injınırıng», «ES-145» tikushaqtaryn shyǵaratyn «Eurocopter Qazaqstan Injınırıng» frantsýz-nemis kompanııasy, radıostansalardy óndiretin frantsýzdyń «Tales Injınırıng» jáne ıspandyq «Indra Qazaqstan» kásiporyndary bar», - deıdi T.Janjúmenov.