KADEX-2018: Túrkııalyq «Otokar» kompanııasy úzdik brondy mashınalaryn tanystyrdy
Kórmeniń «Brondy dóńgelekti kólikterdiń qazirgi damý tendentsııasy» atty sessııasynda «Otokar» ókili atalmysh kompanııanyń áskerı kólikteriniń slaıdtar arqyly áleýetin pash etti.
«Men bizdiń kompanııanyń tarıhy, tájirıbesi men ónimderi týraly aıtyp bergim keledi. Bizdiń ónimder jyl saıyn birneshe qurlyqtaǵy elderge jetkizilip turady. «Otokar» kompanııasynyń jumysy 1918 jyldan bastalady. Qazirgi tańda kompanııamyzdyń kólik salasyndaǵy progresine toqtalsam deımin», - deıdi Tamer Sırkalı.
Onyń aıtýynsha, kompanııanyń taktıkalyq brondy kólikterine sońǵy jyldary jańartyla óndirilip jatyr. «Otokardyń» jeńil brondy kóligi 30 elde qoldanysta. Onyń ishinde Qazaqstan da bar. Tehnıkanyń ereksheligi - qysta -40 gradýstyq sýyqta da minsiz jumys atqara alady. Demek, ártúrli klımattyq jaǵdaıǵa beıimdelgen. Qazirgi ýaqytta atalǵan ónimniń 4 myńǵa jýyǵy qurastyrylýda.
Tamer Sırkalı atap ótkendeı, ««Otokar» sońǵy jyldary jeńil brondy kólikti qurastyrý turǵysynan eń úzdik kompanııa bolyp otyr.
«Kompanııa qurastyratyn kólikterdiń aldymen matematıkalyq ólshemderi jasalady. Keıin kólik qurastyrylǵannan keıin brondy kólikter myń shaqyrymǵa deıin synaqtan ótedi. Birshama synaqtan keıin kólikterimizdiń synaqtaǵy shamasy matematıkalyq ólshemmen týra sáıkes keletinin ańǵardyq. Osylaısha, kelesi brondy tehnıkalardyń dızaınyn ekran arqyly ázirleýge qol jetkizdik», - deıdi Tamer Sırkalı.
Onyń aıtýynsha, kompanııa qurastyrǵan «Kobra» kóligi on jyl buryn óndirilgen. Ol tehnıka ártúrli geografııalyq jáne klımattyq jaǵdaıǵa beıimdelgen.
«Kólikterimizdi negizgi tórt talap boıynsha qurastyramyz. Olar: qozǵalys, qýattylyq, qorǵanys jáne ıkemdilik. Kóliktiń qýattylyǵy onyń áleýetin kórsetedi. Qorǵanys - qaýipke qarsy tustardy eskere qurastyrylsa, ıkemdilik - qoldanys kezindegi yńǵaılylyqty qamtamasyz etýge baǵyttalǵan», - dedi Tamer Sırkalı.
Aıta ketsek, buǵan deıin «Otokar» kompanııasynyń bas dırektory Serdar Gergıých brondy kólik qurastyrý tehnologııasyn Qazaqstanǵa engizýge daıyn ekenin aıtqan bolatyn.
Onyń aıtýynsha, kompanııa alǵashqy qadam retinde Qazaqstan aýmaǵynda dóńgelekteriniń qalpy 8-8-dik brondy mashınalardy jasaýdy josparlap otyr. Qazirgi ýaqytta Qazaqstan basshylyǵyndaǵy jaýapty ókildermen túrkııalyq kompanııa kelissózder júrgizýde.
Eske sala ketsek, búgin Astanada Elbasy Nursultan Nazarbaevtyń qatysýymen «KADEX-2018» V halyqaralyq kórmesi ashyldy. Kórme 26 mamyrǵa deıin jalǵasady. Kórmege Reseı, Belarýs, Qyrǵyzstan, Armenııa, Túrkııa, Iordanııa, Ázerbaıjan, Izraıl, Italııa syndy 40-tan astam elderdiń ókilderi qatysady.
Sondaı-aq, Belarýs, Belgııa, Bolgarııa, Brazılııa, Germanııa, Izraıl, Úndistan, Ispanııa, Italııa, QHR, Nıderlandy, RF, AQSh, Serbııa sııaqty álemniń 28 eliniń 318 kásiporyny óz ónimderin usynady.
Kórmeni uıymdastyrýshy - QR Qorǵanys jáne aeroǵarysh ónerkásibi mınıstrligi, «Qazaqstan ınjınırıng» UK» AQ.
