«KADEX-2016» kórmesine avıatsııalyq tehnıkalyq ortalyqtyń daıyndyǵy aıaqtalyp qaldy (FOTO)

ASTANA. QazAqparat - Astanada avıatsııalyq tehnıkany jóndeý jáne tehnıkalyq qyzmet kórsetý jóninde alǵashqy kópbeıindi kásiporyn - avıatsııalyq tehnıkalyq ortalyqtyń salynýy aıaqtalyp qaldy.

«Elimiz úshin bul otandyq óndirýshi, ınjenerlerimiz turǵyzǵan mańyzdy nysan. Qurylystyń aıaqtalýy jaqyndap qaldy. Qurylys-montajdaý jumystary 97 paıyzǵa oryndaldy. Biz barlyq ynta-jigerimizdi  salýdamyz jáne jospar boıynsha aıaqtaımyz dep oılaımyn», - dedi «Qazaqstandyq avıatsııalyq ındýstrııa» JShS-nyń qurylys jónindegi bas dırektorynyń orynbasary Syrymbet Sádýaqasov.

Ortalyqtyń alǵashqy kórsetilimi «KADEX-2016» halyqaralyq qarý-jaraq pen áskerı-tehnıkalyq múlik kórmesinde usynylady. Bolashaqta ortalyq áýe kemelerine tehnıkalyq qyzmet kórsetý boıynsha anaǵurlym keńinen qamtýdy josparlar otyr.

«Ol jerde An jáne S-295 tıpindegi áskerı ushaqtarǵa tehnıkalyq qyzmet kórsetý júrgiziledi. Ári qaraı áleýetti qurylymdardyń ushaqtaryn qabyldap alýdy josparlaýdamyz», - dedi «Qazaqstandyq avıatsııalyq ındýstrııa» JShS kóliktik avıatsııasy áýe kemeleriniń bólim bastyǵy Qaıyrjan Qushanbaev.

Ortalyqtyń basshylyǵy óz kadrlaryn daıyndaýǵa úlken mán beretinin aıta keteıik. Ol úshin mamandar toby Ispanııadaǵy «Airbus Millitary» oqý ortalyǵyna, ekinshi top Ýkraınadaǵy «Antonov» memlekettik kásipornyna, al 3-top Izraılge tehnıkalyq qyzmet kórsetý jáne jóndeý boıynsha meńgerý jáne tájirıbe jınaqtaý úshin oqýǵa attanady. Ortalyqtyń qurylysymen «Qazınjınırıng» UK» AQ-tyń enshiles kásiporny «Qazaqstandyq avıatsııalyq ındýstrııa» JShS aınalysady.

Avıatsııalyq ortalyqtyń jalpy qurylysynyń aýdany 62 660 sharshy metrdi quraıdy. Búginde ol QR Qarýly Kúshteriniń múddesinde ǵana múmkindikterdi iske asyryp qoımaı, sonymen birge óńirlik deńgeıge shyǵýǵa múmkindik beretin birden-bir ortalyq, dep habarlaıdy QR QM baspasóz qyzmeti.