Kadetter arasyndaǵy álem chempıonatynda qazaqstandyq palýan qola júldeger atandy
ASTANA. QazAqparat - Slovakııada kúres túrlerinen kadetter arasyndaǵy álem chempıonatyn erkin stıldegi qazaqstandyq palýan Qýatbek Muhambet (58 keli) qola júldeni enshiledi. Bul týraly Sporttyq jekpe-jek jáne kúsh qoldanylatyn sport túrleri konfederatsııasynyń málimetinde habarlandy.
«Qazaqstandyq sportshylardyń arasynda birinshi jarys kúninde qurmet tuǵyryna Qýatbek Muhambet jetti. Ol «qola» júlde úshin qıyn básekede Túrkııa ókili Álı Kamany jeńdi»,- delingen taratylǵan aqparatta.
Osy arqyly Qazaqstan quramasynyń qorjynynda búginde úsh medal bar. Budan buryn habarlanǵandaı, álem chempıony retinde Ernar Fıdahmetov (grek-rım kúresi) tanylsa, Irına Kapıtanova (áıelder kúresi) kúmis júldeni ıelendi.
