Kadet korpýsynyń bıylǵy túlekteri sany jaǵynan basym - QR QM (FOTO)

ASTANA. QazAqparat - Sh. Ýalıhanov atyndaǵy Qorǵanys mınıstrliginiń Kadet korpýsy bastapqy áskerı bilim baǵdarlamasy boıynsha QR QK serjanttyq laýazymynda qyzmet atqaratyn kishi komandalyq quramdy daıarlaýdy júzege asyrady, dep habarlady QR Qorǵanys mınıstrliginiń baspasóz qyzmetinen.

Bıylǵy jyly QR QM Kadet korpýsyn eń kóp túlek, ıaǵnı 214 adam bitirdi. Oqý orny ashylǵannan beri onda 2 224 serjant «Áskerı basqarý» mamandyǵy boıynsha oqyp shyqty. Onyń ishinde 2012 jyly - 206 adam, 2013 jyly - 176 jáne 2014 jyly 181 serjant bitirdi. Aıta keteıik, Kadet korpýsyna 17-21 jas aralyǵyndaǵy jastar, sondaı-aq jasy 23-ten aspaǵan kelisimshart negizinde jáne merzimdi áskerı qyzmet ótegen sarbazdar oqýǵa qabyldanady. Jalpy oqý baǵdarlamasy 1 jyl 10 aıǵa eseptelgen. Birinshi kýrsta kadetter áskerı qyzmettiń negizderin úırenip, áskerı ant qabyldaıdy jáne 10 jylǵa kelisimshartqa qol qoıady. Ekinshi kýrstan bastap jaýyngerlik taǵlymdamadan ótedi. Olar QR QK áskerı bólimderine baryp, teorııalyq bilimderin is júzinde synaıdy. Oqýdy bitirisimen kadetter «Áskerı basqarý» mamandyǵy boıynsha «Áskerı basqarýdyń kishi mamany (menedjer)» biliktiligi berilgeni týraly dıplom alady. Sonymen qatar, «Mehanıka - 3-synypty BMP júrgizýshisi» jáne «V», «S» kategorııaly avtokólik júrgizýshisi kýálikteri beriledi.