Kádege jaratý tólemderi óńirlerde qatty turmystyq qaldyqtar polıgondaryn salýǵa jumsalýy múmkin
ASTANA. KAZINFORM – Kádege jaratý tólemderi óńirlerde qatty turmystyq qaldyqtar polıgondaryn salýǵa jumsalýy múmkin. Bul jaıynda Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
– Qazaqstan Respýblıkasynyń «jasyl ekonomıkaǵa» kóshýi jónindegi tujyrymdamaǵa sáıkes ekologııalyq talaptar men sanıtarlyq normalarǵa saı keletin qatty turmystyq qaldyq polıgondarynyń úlesi 2050 jylǵa qaraı 100 paıyzdy quraýǵa tıis. Osy maqsatta kádege jaratý tólemderinen túsken qarajatty óńirlerdegi QTQ polıgondaryn salýǵa jáne jańǵyrtýǵa jumsaý múmkindigi pysyqtalyp jatyr, - dedi Úkimet basshysy jaýabynda.
Onyń atap ótýinshe, Ekologııa kodeksinde qaldyqtardy basqarýdaǵy rettegish quraldar – qaýipti qaldyqtardy qalpyna keltirý jáne joıý salasyndaǵy qyzmetti lıtsenzııalaý tetikteri, sondaı-aq qaldyqtardy jınaý, suryptaý jáne tasymaldaý jónindegi qyzmettiń habarlama tártibi tolyq kólemde engizilgen. Zańdy tulǵalar úshin ekologııalyq zańnama talaptaryn buzǵany úshin tıisti jaýapkershilik kózdelgen.
– Jeke tulǵalarǵa qatysty talaptardy qatańdatý bóliginde 2025 jylǵy qańtarda Ákimshilik quqyq buzýshylyq týraly kodekske qaldyqtardy belgilengen oryndardan tys tastaý úshin paıdalanylǵan kólikti tárkileýdi qosa alǵanda, qoqysty kez kelgen jerge tastaı salǵany úshin jaýapkershilikti qatańdatýdy kózdeıtin túzetýler engizildi, - dedi Oljas Bektenov.
Buǵan deıin Úkimet qaldyqtardyń barlyq túrin basqarý tujyrymdamasyn ázirleıtinin jazǵan edik.