Kaddafıdiń balasy tutqynnan qashyp ketti
ASTANA. 23 tamyz. QazAqparat - Trıpolıde kóterilisshilerdiń qolyna túsken Lıvııa kósemi Mýammar Kaddafıdiń balasy Mohammad úıqamaqtan qashyp ketken.
Bul týraly búgin «Ál-Jazıra» telearnasyna silteme jasap Reuters agenttigi habarlady.
Aldyn ala jasalǵan boljam boıynsha, qashýdy Mýammar Kaddafıdiń jaqtastary uıymdastyrǵan. Olar Mohammad qamaqta otyrǵan úıge shabýyl jasap, ony bosatyp alǵan.
22 tamyz, dúısenbige qaraǵan túni kóterilisshiler Mohammad Kaddafıdiń úıin qorshaýǵa alǵan. Sol kezde Lıvııa kóseminiń balasy «Ál-Jazıra» telearnasy arqyly efırge shyǵyp, narazylyq bildirýshiler onyń úıin atqylaı bastaǵanyn, tipti, terezesiniń aldynda da myltyq kezengen adamdar turǵanyn málimdegen. Osydan keıin kóp keshikpeı onyń úıqamaqqa alynǵany belgili boldy.
Kaddafı bılik qurǵan kezde onyń úlken uly Mohammadtyń saıasatpen aınalyspaǵany anyqtalýda. Ol Mýammar Kaddafıden ajyrasqan anasymen birge turǵan.
