Kaddafıdiń áskeri Trıpolıdegi otelde 35 sheteldik jýrnalısti ustap otyr
ASTANA. 24 tamyz. QazAqparat - Lıvııa kósemi Mýammar Kaddafıdiń senimdi áskerleri Trıpolı otelderiniń birinde 35 sheteldik jýrnalısti kúshpen ustap otyr,
dep habarlaıdy Korrespondent.net.
Ál-Arabııa telearnasy habarlaǵandaı, jýrnalıster Rıksos qonaqúıine 23 tamyzǵa qaraǵan túni Kaddafıdiń uly Seıf ál-Islamnyń úndeýinen keıin qamalǵan.
Jýrnalısterdiń sózine qaraǵanda, olarǵa ál-Islammen birge kóshege shyǵýǵa, ony sýretke jáne beınetaspaǵa túsirýge, bul týraly aqparat taratýǵa ruqsat etilgen. Keıin BAQ qyzmetkerlerin otelge keri shaqyryp alady. Sodan beri olar qonaqúıden shyǵa almaýda.
Qazirgi tańda jýrnalıster tamaq pen aýyzsýdyń joqtyǵyna, sondaı-aq kásibı qyzmetin iske asyrýǵa múmkindiktiń bolmaýyna baılanysty aryzdanyp jatyr. Olar qonaqúıden shyǵýǵa árekettengen kez kelgen adamdy ajal oǵy kútip turǵanyn aıtýda.
