Kaddafı taǵyn ulyna bosatýǵa ázir
ASTANA. 13 sáýir. QazAqparat - Lıvııa basshysy Mýammar Kaddafı saıası sahnadan ketýge daıyn.
MIGnews.com basylymyna Rosbalt agenttiginiń silteme jasap habarlaýynsha, bul týraly Lıvııanyń Ótpeli ulttyq keńesiniń ókilderi habarlady. Degenmen Kaddafıdiń otstavkasy úshin birqatar sharttar oryndalýy kerek.
Birinshiden, otstavka «qaýipsiz jolmen jáne tıisti qurmet-qoshemettermen» ótýi tıis. Ekinshiden, Kaddafıge «mańyzdy qyzmet usynylýy kerek» jáne úshinshiden, bılik onyń uly -Saıf ál-Islamǵa berilýi kerek.
Ótpeli ulttyq keńes ókilderiniń aıtýynsha, kópshilik Saıf ál-Islamdy «ákesiniń balasy» retinde ǵana qarastyrǵanymen, «Lıvııanyń qabaǵan tóbetinen góri», onyń ulymen jumys istegen jeńildeý bolady dep otyr.
Esterińizge sala keteıik, jaqynda Afrıka odaǵynyń delegatsııasy Trıpolı men Bengazıge qantógisti toqtatýdy jáne qorshaýdaǵy qalalardyń turǵyndary úshin «gýmanıtarlyq dálizder» ashýdy, sondaı-aq saıası tyǵyryqtan shyǵatyn joldy izdeý týraly tikeleı kelissóz bastaýdy usynǵan bolatyn.
Resmı Lıvııa ókimeti Afrıka odaǵynyń usynysyna oń jaýap berdi. Kaddafı men Afrıka odaǵy delegatsııasynyń arasyndaǵy kelissóz birneshe saǵatqa sozyldy.
Ońtústik Afrıka Respýblıkasynyń Prezıdenti Djeıkob Zýma, eldegi jaǵdaıdy retteý jónindegi dıplomattardyń usynysyn Kaddafıdiń qabyldaǵanyn qýattady.
Dıplomattar Lıvııa daǵdarysyn sheshýdiń joldaryn izdestirip jatqan kezde de Kaddafı armııasy men kóterilisshi kúshterdiń arasyndaǵy qarýly qaqtyǵys bir sát toqtaǵan joq.
