Qabyldanǵan zań jobasynyń bir mindeti - kólik quraldaryn mindetti tehnıkalyq baıqaýdan ótkizý júıesiniń tıimdiligin arttyrý bolyp tabylady
ASTANA. 29 jeltoqsan. QazAqparat - Keshe Qazaqstan Respýblıkasy Parlamentiniń Senaty «Qazaqstan Respýblıkasynyń keıbir zańnamalyq aktilerine mehanıkalyq kólik quraldaryn jáne olardyń tirkemelerin mindetti tehnıkalyq baıqaýdan ótkizý máseleleri boıynsha ózgerister men tolyqtyrýlar engizý týraly» Zań jobasyn qabyldady.
Qazaqstan Respýblıkasy Kólik jáne kommýnıkatsııa mınıstrliginiń baspasóz qyzmetiniń habarlaýynsha, Zań jobasy «Qazaqstan Respýblıkasynda quqyq qorǵaý qyzmeti men sot júıesiniń tıimdiligin arttyrý jónindegi sharalar týraly» Elbasynyń 2010 jylǵy 17 tamyzdaǵy № 1039 Jarlyǵyn júzege asyrý maqsatynda ázirlendi.
Bul Zań jobasyn qabyldaýdyń jáne bir maqsaty - kólik quraldaryn mindetti tehnıkalyq baıqaýdan ótkizý júıesiniń tıimdiligin arttyrý bolyp tabylady.
Budan buryn habarlanǵandaı, kólik quraldaryn tehnıkalyq baıqaýdan ótkizýdi laıyqty tehnıkalyq baıqaý jelileri bar jeke ortalyqtar júrgizedi.
Bul rette, atalǵan ortalyqtardyń jol qozǵalysynyń qaýipsizdigine jáne ekologııaǵa tikeleı áserin tıgizetin tejeýish júıesi men rýldik basqarýdyń, aspaly elementter men atmosferaǵa shyǵarylatyn zııandy zattardyń tıimdiligi sekildi parametrlerdi avtomatty túrde anyqtaıtyn tehnıkalyq baıqaýdyń statsıonarlyq jáne mobıldi jelileri bolýy shart.
Sonymen birge, respýblıkada mamandyrylǵan tehnıkalyq baıqaý jelileriniń qajetti sanynyń bolmaýyna baılanysty 1 jylǵa, ıaǵnı 2012 jylǵy 1 qańtarǵa deıin ótpeli kezeń qarastyrylǵan.
Kórsetilgen merzimge deıin tehnıkalyq baıqaýdy jol polıtsııasy organdary da, sondaı-aq jekemenshik tehnıkalyq baıqaý ortalyqtary da júrgizedi.
Mobıldi jelilerdiń jumys isteýi tirkelgen kólik quraldarynyń azdyǵyna baılanysty statsıonarlyq jelilerdi uıymdastyrý tıimsiz bolyp tabylatyn aýyldyq óńirler men aýdandardy qamtýǵa múmkindik beredi.
Usynylǵan Zań jobasynyń tehnıkalyq baıqaýdy ótkizý tártibi tehnıkalyq baıqaýdyń halyqaralyq sertıfıkatyn berýdi qarastyrǵan. Ondaı sertıfıkaty bar otandyq operatorlar Vena Kelisimine qatysýshy elderdiń aýmaǵynda júk jáne jolaýshylar tasymalyn kedergisiz 38 elde júzege asyra alady (Eýroodaq elderi, Reseı, Belarýs, Ýkraına jáne t.b.).
