Qabyldanatyn zańdardy halyqqa túsindirý jumystaryn kúsheıtý qajet - Nursultan Nazarbaev
ASTANA. QazAqparat - Qabyldanatyn zańdardy halyqqa túsindirý jumystaryn kúsheıtý qajet. Bul týraly búgin 6-shy saılanǵan QR Parlamentiniń úshinshi sessııasynyń ashylýynda Elbasy Nursultan Nazarbaev aıtty, dep habarlaıdy QazAqparat.
«Sońǵy ýaqytta zań shyǵarmashylyq protsess barynsha ashyq bola tústi. Parlamenttik tyńdaýlar ótkiziledi, zań jobalaryn qaraýǵa sarapshylar, azamattyq qoǵam ókilderi men buqaralyq aqparat quraldary tartylady. Degenmen, azamattar barlyq ýaqytta da aqparatqa qanyp otyrǵan joq. Zańnan týyndaıtyn ózderiniń quqyqtary men mindetterin bilmeıdi», dedi Elbasy.
Qazaqstan Prezıdenti qabyldanatyn zańdar aldymen qoǵammen, halyqpen birge talqylanyp, túsindirilmeıtindigin basa aıtty.
«Sondyqtan depýtattar da, Úkimet músheleri men oblys ákimderi de túsindirý jumystaryna aıryqsha nazar aýdarýy tıis. Qazaqstandyqtardyń barlyq zańnamalyq jańashyldyqtardan jáne bizdiń sheshimderimizden habardar bolýǵa tolyq quqyǵy bar», - dedi Nursultan Nazarbaev.
Osy oraıda Qazaqstan Prezıdenti keńes zamanynda KSRO Joǵarǵy keńesiniń qaýlylaryn qarapaıym adamdarǵa jetkizý úshin tipti tramvaılarǵa da ilip qoıatyndyǵyn eske saldy.
«Qabyldanatyn sheshimder týraly aqparattardy barlyq azamattarǵa jetkizý qajet. Zań básekege qabiletti, pragmatıkalyq, eń joǵarǵy halyqaralyq standarttarǵa saı bolýy tıis», - dedi Memleket basshysy.
