Kabýldaǵy jarylystan 16 adam qaza bolyp, 60-y jaraqattandy
KABÝL. QazAqparat - Aýǵanstan astanasy Kabýl áýejaıyna jaqyn jerde bolǵan joıqyn jarylystyń saldarynan kem degende 16 adam qaza taýyp, taǵy 60-y jaraqattandy. Bul týraly TASS agenttigi jergilikti TOLOnews saıtyna silteme jasap habarlaýda.
Buǵan deıin habarlaǵanymyzdaı, Aýǵanstannyń birinshi vıtse-prezıdenti Abdýl Rashıd Dýstým mingen aıyrý belgileri joq charterlik reıs jeksenbi kúni saǵat 16.30-da (Astana ýaqytymen 18.00) Hamıd Karzaı atyndaǵy Halyqaralyq áýejaıǵa qonǵan bolatyn. Júzdegen adam, sonyń ishinde joǵary laýazymdy tulǵalar Túrkııada 14 aı bolyp kelgen vıtse-prezıdentti qarsy alý úshin ushyp-qoný jolaǵyna jınalyp turǵan edi.
Abdýl Rashıd Dýstým brondy kólikpen áýejaıdan shyqqannan keıin birshama ýaqyttan soń qýatty jarylys boldy. TOLOnews telearnasynyń habarlaýynsha, ajal qushqandardyń deni qaýipsizdik kúshteriniń qyzmetkerleri. 2017 jyly Túrkııaǵa qashyp ketip, qaıta oralǵan sheneýnik A.Dýstým zardap shekken joq.
Buǵan deıin qaza bolǵan 11 adam, zardap shekken 14 adam týraly aıtylǵan edi.
Jarylys úshin jaýapkershilikti «DAISh» (Qazaqstan jáne ózge de birqatar memleketter aýmaǵynda tyıym salynǵan) lańkestik toby óz moınyna aldy jáne terrorlyq aktiniń maqsaty Aýǵanstannyń birinshi vıtse-prezıdenti Abdýl Rashıd Dýstýmnyń kózin joıý bolǵanyn aıtty.
