Kabýldaǵy terakt qurbandaryna eske alý úshin Eıfel shamdary sóndiriledi

ASTANA. QazAqparat - Jeksenbiniń túnine Parıjdegi Eıfel munarasynyń shamdary 1 saǵatqa óshiriletin boldy. Bul shara senbi kúni 100 adamnyń ómirin jalmaǵan Kabýlde bolǵan terakt qurbandaryn eske alý maqsatynda uıymdastyrylǵaly otyr. Bul týraly Frantsııa astanasynyń meri Ann Idalgo málim etti, dep habarlaıdy TASS.

«Búgin keshkisin Kabýldyń ortalyǵynda bolǵan aıýandyqpen jasalǵan terakt qurbandarynyń qurmetine Eıfel munarasy sónedi»,-dep jazdy ol.

Idalgonyń aıtýynsha, Parıj osy áreketi arqyly ózderiniń Aýǵanstan halqymen birge ekendikterin kórsetpek.

«Parıj ben onyń turǵyndary qazir terrorshylardyń jabaıylyqpen jasaǵan kezekti áreketteriniń qurbany bolyp otyrǵan aýǵan halqymen birge»,-dedi mer.