Kabýldaǵy gospıtal mańynda eki jarylys boldy

KABÝL. QazAqparat – Seısenbi, 2 qarasha kúni Aýǵanstan astanasy Kabýldaǵy Sardar Muhammad Daýd atyndaǵy áskerı gospıtal mańynda eki joıqyn jarylys, atylǵan oq daýysy estildi, dep habarlaıdy QazAqparat ToloNews-ke silteme jasap.

Aýǵanstan ýaqytsha úkimetiniń Aqparat jáne mádenıet mınıstriniń ekinshi orynbasary Bılal Karımıdiń aıtýynsha, alǵashqy jarylys Kabýldyń 10- aýdanyndaǵy Muhammed Daýd han atyndaǵy gospıtaldyń kireberisinde bolǵan.

Ekinshi jarylys ta gospıtalǵa jaqyn jerde bolǵan.

Іshki ister mınıstrliginiń ókili Saıd Hostı jarylystardyń biri gospıtaldyń kireberisinde bolǵanyn rastady. Onyń aıtýynsha, jarylystan qurban bolǵandar bar.

Aýyr halde zardap shekkenderdiń barlyǵy aýrýhanaǵa jatqyzylǵan. Oqıǵa ornyna qaýipsizdik kúshteri kelgen. Jaraqat alǵandar jedel járdem kólikterimen osy aımaqtaǵy aýrýhanalarǵa jetkizilgen.

Jarylystardyń saldarynan kem degende toǵyz adam jaraqat aldy, olar Kabýldaǵy jedel járdem aýrýhanasyna jetkizildi.

TASS habarlaǵandaı, Muhammed Daýd han atyndaǵy aýrýhana 400 tósek-orynǵa eseptelgen jáne Aýǵanstan Qorǵanys mınıstrligine tıesili.

Kýágerlerdiń aıtýynsha, oqıǵa mınalanǵan kóliktiń jarylýy saldarynan bolǵan.

Sondaı-aq, sheteldik dıplomatııalyq mıssııalar ornalasqan Vazır-Akbar han oramyndaǵy jarylystardan keıin shabýylshylar men «Talıban» qozǵalysynyń (Qazaqstanda tyıym salynǵan – red.) sodyrlary arasynda atys bolyp jatqany habarlandy.

Іshki ister mınıstrliginiń habarlaýynsha, oqıǵa ornyna «Talıban» qozǵalysynyń (Qazaqstanda tyıym salynǵan – red.) arnaıy kúshteri jiberildi.

Kýágerlerdiń aıtýynsha, Aýǵanstandaǵy IM fılıalynyń birneshe sodyry aýrýhanaǵa kirip, qaýipsizdik kúshterimen qaqtyǵysqa túsken, dep habarlady Al Jazeera.

Jańartylǵan málimetterge sáıkes, Kabýldaǵy Aýǵanstannyń eń iri áskerı gospıtaliniń janyndaǵy eki jarylys pen atys saldarynan 19 adam qaza taýyp, 43 adam jaraqat aldy, dep habarlaıdy Al Jazeera Aýǵanstannyń ýaqytsha úkimetiniń ishki ister mınıstrligine silteme jasap.