Kabýldaǵy lańkestik áreketten tálipterdiń bir mınıstri qaza tapty
ASTANA. KAZINFORM – Aýǵanstandaǵy «Talıban» ýaqytsha úkimetiniń bosqyndar isi jónindegi mınıstri Halıl ýr-Rahman Hakkanı Kabýldaǵy meshit aldynda bolǵan lańkestik árekette qaza tapty. Bul týraly CNN habarlady.
Hakkanı qujattarǵa qol qoıý kezinde jankeshti ózin-ózi jaryp jibergeni atap ótildi. Talıban ókilimen birge taǵy 6 adam qaza tapqan.
– Aýǵanstannyń bosqyndar isi jónindegi mınıstri Halıl ýr-Rahman Hakkanıdiń jankeshti jasaǵan shabýyldan qaza tapqany týraly aqparat rastaldy, - delingen habarlamada.
Hakkanı «Talıban» bılikke oralǵannan beri Aýǵanstandaǵy jarylystyń qurbany bolǵan eń joǵary laýazymdy sheneýnik boldy. Ol 2021 jyldyń qyrkúıeginde Aýǵanstannyń bosqyndar isi jónindegi mınıstri bolyp taǵaıyndalǵan.
Eske sala keteıik, buǵan deıin Aýǵanstanda sheneýnikterge sýretke túsýge jáne suhbat berýge tyıym salynǵanyn habarlaǵan edik.