Kabýlda kóz jumǵan qazaqstandyq bıznespen aınalysqan - QR SІM
ASTANA. QazAqparat - QR Syrtqy ister mınıstrliginiń resmı ókili Ánýar Jaınaqov Aýǵanstanda kóz jumǵan qazaqstandyqtyń denesin Otanyna qaıtarý jumysy júrgizilip jatqanyn aıtyp berdi, dep habarlaıdy «QazAqparat» HAA tilshisi.
«Kabýldaǵy qonaq úıge lańkesterdiń shabýyly barysynda Qazaqstan azamaty mert boldy. Ol Astana qalasynyń 1978 jyly týǵan turǵyny bolǵan. Ol telekommýnıkatsııa salasynda jumys atqaratyn aýǵan kompanııalarynyń biriniń shaqyrýymen Aýǵanstanǵa issaparmen barǵan. Qazirgi ýaqytta bizdiń dıplomattar kóz jumǵane azamattyń denesin Qazaqstanǵa jetkizý boıynsha qajetti jumysty júrgizip jatyr», - deıdi Ánýar Jaınaqov.
Ánýar Jaınaqov sonymen qatar, qaza tapqan adamnyń tegin ázirge aıta almaıtynyn jetkizdi.
«Biz taǵy da qaıtys bolǵan azamattyń týǵan-týystaryna, jaqyndaryna kóńil aıtamyz. Ol kisiniń tegin ázirge aıta almaımyz. Bizdegi aqparat boıynsha ol Aýǵanstanda qazan-qarasha aılarynan beri (2017 jyldyń - avt.) bolǵan. Qazirgi ýaqytta tolyǵyraq málimetterdi jınastyrý ústindemiz», - deıdi Jaınaqov.
Aýǵanstanda qazirgi tańda qansha qazaqstandyqtyń baryna qatysty suraqqa Ánýar Jaınaqov naqty jaýap bere almady.
«Konsýldyq esepte turǵan azamattar bar. Ókinishke qaraı, ol azamat (qaıtys bolǵan - avt.) bizdiń elshiliktegi konsýldyq esepte turmaǵan», - deıdi QR SІM resmı ókili.
Eske sala ketsek, Aýǵanstanda sodyrlardyń qonaqúıge shabýyly saldarynan Qazaqstan azamaty qaza bolǵan edi.
