Kabýlda benzın tasymaldaýshy kólik órtendi: 9 adam opat bolyp, 14-i zardap shekti
KABÝL. QazAqparat – Aýǵanstan astanasy Kabýldyń soltústiginde senbi kúni keshke bolǵan órt saldarynan 9 adam kóz jumdy, taǵy 14 adam zardap shekti, dep habarlaıdy QazAqparat TOLO news-ke silteme jasap.
Kabýldyń irgesindegi aýdandardyń birinde benzın tasýshy kólikte jarylys bolǵan. Kóp uzamaı órt basqa benzın tasýshylardy, sondaı-aq jaqyn mańdaǵy júk kólikteri men avtomobılderdi sharpyǵan. Kýágerlerdiń aıtýynsha, barlyǵy 50-ge jýyq kólik zardap shekken.
Oqıǵaǵa baılanysty Kabýldyń kóptegen aýdandaryn elektrmen jabdyqtaý úzilip, ony qalpyna keltirý jumystary júrgizilýde.
Keleńsiz jaǵdaıdyń sebep-saldary ázirge belgisiz.
