Kabýlda Ázerbaıjannyń qoldaýymen kilem toqý oqý ortalyǵy ashyldy

ASTANA. KAZINFORM –  Kabýlda dástúrli qoldanbaly ónerdi saqtaý jáne áıelderdiń jumyspen qamtylýyn qoldaýǵa baǵyttalǵan kilem toqý oqý ortalyǵy saltanatty túrde ashyldy. Joba Ázerbaıjan úkimetiniń qoldaýymen júzege asyryldy, dep habarlaıdy Kazinform agenttiginiń menshikti tilshisi. 

Resmı ashylý rásimine Ázerbaıjannyń Aýǵanstandaǵy Tótenshe jáne ókiletti elshisi Ilham Mamedov, Aýǵanstan úkimetiniń ókilderi jáne Islam yntymaqtastyǵy uıymynyń (IYU) músheleri qatysty.

Ázerbaıjan Syrtqy ister mınıstrliginiń málimetinshe, joba SІM janyndaǵy Ázerbaıjannyń halyqaralyq damý agenttigi (AIDA) arqyly qarjylandyrylyp, IYU-nyń Aýǵanstandaǵy ókildigi jáne Aýǵanstannyń Eńbek jáne áleýmettik qamtamasyz etý mınıstrligimen birlesip júzege asyrylǵan.

Ortalyqta tórt sheberhana bar. Olar 20 toqý stanogimen, qajetti qural-jabdyqtarmen jáne bir jylǵa jetetin shıkizat qorymen jabdyqtalǵan. Munda bir ýaqytta 80-ge deıin áıel bilim alyp, ózine tabys kózi bolatyn qolóner daǵdylaryn meńgere alady dep kútilýde.

Aýǵanstannyń eńbek mınıstriniń orynbasary Álhadj Maýlavı Ázerbaıjan men IYU-ǵa aýǵan sheberlik dástúrlerin saqtaýǵa jáne az qamtylǵan otbasylardyń ómir súrý jaǵdaıyn jaqsartýǵa qosqan úlesi úshin alǵysyn bildirdi.

IYU-nyń Aýǵanstandaǵy ókili Muhammed Saıd ál-Aııash bul joba tek qoldanbaly ónerdi damytýǵa ǵana emes, uıymǵa múshe elderdiń arasyndaǵy yntymaqtastyqty nyǵaıtýǵa da úles qosatynyn atap ótti.

Óz sózinde elshi Ilham Mamedov Ázerbaıjannyń Aýǵanstanda birqatar gýmanıtarlyq jáne ınfraqurylymdyq jobalardy júzege asyrǵanyn jáne eldi damytýǵa baǵyttalǵan kúsh-jigerdi qoldaýdy jalǵastyratynyn aıtty. Sondaı-aq, ol 2026 jyly ótetin IYU sammıtinde Ázerbaıjannyń tóraǵalyǵy qarsańynda halyqaralyq yntymaqtastyqtyń mańyzdylyǵyn atap ótti.

Qazaqstan Prezıdenti Qasym-Jomart Toqaev óziniń Aýǵanstan boıynsha arnaıy ókili Erkin Tuqumovqa Aýǵanstanmen eń aldymen saýda-ekonomıkalyq jáne gýmanıtarlyq salalarda tıimdi ózara is-qımyldy jolǵa qoıýdy tapsyrdy.