Kabo-Verdede ishek ınfektsııasynan 4 brıtanııalyq týrıst qaıtys boldy
ASTANA. KAZINFORM – Kabo-Verde araldarynda ishek ınfektsııasyn juqtyrý saldarynan 4 brıtanııalyq azamat qaıtys boldy. Bul týraly BBC habarlady.
Irwin Mitchell zań fırmasynyń málimetinshe, qaıtys bolǵandar qatarynda Bedfordshırden 55 jastaǵy Mark Eshlı, Bırmıngemnen 64 jastaǵy Elena Ýolsh, Glostershırden 64 jastaǵy Karen Pýlı jáne aty-jóni jarııalanbaǵan 56 jastaǵy er adam bar. Barlyǵy 2023 jyly Afrıkanyń batys jaǵalaýyndaǵy arhıpelagqa barǵan kezde aýyrǵan. Sonymen qatar 2023 jyldyń qańtarynan beri Kabo-Verdede demalǵan 6 brıtanııalyq týrıst qaıtys bolǵany anyqtaldy.
Irwin Mitchell kompanııasy alty otbasynyń densaýlyqqa zııan keltirilgeni týraly talap aryz bergenin habarlady. Tui týroperatory shaǵymdardy tekserip jatqanyn jáne aýrý belgileri baıqalǵan klıentterge qoldaý kórsetilgenin málimdedi.
Mark Eshlıdiń jubaıy Emma kúıeýiniń qaıtys bolýyna baılanysty qatty kúızeliske túskenin aıtty. Qazan aıynda demalystyń úshinshi kúninde Mark ish aýrýy, dıareıa, qusý, joǵary temperatýra jáne álsizdik belgilerin sezingen. Sapar Tui arqyly brondalyp, quny 3 myń fýnt sterlıngten asqan. 9 qazanda Emma týroperatordyń qosymshasy arqyly kúıeýiniń jaǵdaıy týraly habarlap, Sal aralyndaǵy qonaqúıdiń sanıtarlyq jaǵdaıynyń nashar ekenin atap ótken. Aýrý belgileri Ulybrıtanııaǵa oralǵannan keıin de saqtalǵan. 12 qarashada qant dıabetimen aýyratyn Eshlı Hoýton-Redjıstegi úıinde esinen tanyp, aýrýhanaǵa jetkizilgen soń qaıtys boldy. Polıtsııa onyń óliminiń sebebin anyqtap jatyr.
Medbıke Elena Ýolsh 2025 jyldyń tamyzynda Sal aralyndaǵy Riu Cabo Verde kýrortynda demalyp júrgen kezde qaıtys boldy.
Karen Pýlı 7 qazanda qurbysymen birge Tui arqyly satyp alǵan eki aptalyq demalysqa Salǵa barǵan. 11 qazanda áıelde dıareıa paıda bolyp, kelesi kúni tońazytqyshtan aqqan sýǵa taıyp qulap, jambasyn syndyryp alǵan. Ol jergilikti emhanaǵa jetkizilip, tórt kún boıy dıareıa men qusý belgileri saqtalǵan. 16 qazanda sanıtarlyq avıatsııamen Tenerıfege evakýatsııalanyp, kelesi kúni qaıtys boldy. Onyń kúıeýi Endı Pýlı áıeliniń aýyr jaǵdaıda bolǵanyn jáne emhana men týroperator arasyndaǵy baılanys nashar bolǵanyn aıtty. Kabo-Verde bıligi bergen ólim týraly kýálikte ólim sebebi kóp aǵzalyq dert, sepsıs, júrek pen tynys alý qyzmetiniń toqtaýy jáne jambas synýy dep kórsetilgen.
56 jastaǵy taǵy bir er adamnyń ólimi týraly tolyq aqparat jarııalanǵan joq. Basqa qurbandar qatarynda 2023 jyldyń qańtarynda Sal aralynda qaıtys bolǵan 62 jastaǵy Djeın Preslı (Geınsboro qalasynan) jáne 2024 jyldyń qarashasynda uqsas aýrýdan kóz jumǵan 60 jastaǵy Ýotford turǵyny bar.
Irwin Mitchell zańgeri Djatınder Pol kýrorttarda ishek ınfektsııalarynyń keń taralýy men qaıtalanýyna baılanysty alańdaýshylyq bildirdi. Ol qazirgi ýaqytta Kabo-Verdege baryp aýyrǵan 1500-den astam adamnyń múddesin qorǵaıtyndaryn aıtty.
Tui kompanııasy sot isi qaralyp jatqandyqtan tolyq túsinikteme bere almaıtynyn, alaıda barlyq shaǵymdy zertteýdi jalǵastyratynyn málimdedi. Kompanııa 2022 jyldan beri arhıpelagqa mıllıonnan astam týrıst jibergenin jáne densaýlyq máseleleri týraly habarlaǵan barlyq klıentke kómek kórsetkenin atap ótti.