Kabo-Verdede avtobýs apatynan 25 adam qaza tapty
ASTANA. KAZINFORM – Senbi kúni Kabo-Verdedegi Fogý aralynda avtobýs joldan shyǵyp, tik jardan qulaǵan. Sonyń saldarynan keminde 25 adam qaza taýyp, taǵy birneshe adam jaraqat aldy, dep jazdy Sınhýa agenttigi.
Bul qaıǵyly jaǵdaıdy alǵash bolyp el prezıdenti Joze Marııa Nevesh habarlady.
Jergilikti Inforpress agenttiginiń málimetinshe, jol-kólik oqıǵasy San-Fılıpe mýnıtsıpalıtetiniń soltústik taýly aımaǵyndaǵy Sha-dash-Kaldeırash pen Kampanash-dı-Sıma eldi mekenderi arasyndaǵy jolda bolǵan. Avtobýs joldan shyǵyp, shamamen 30 metr bıiktiktegi jardan qulaǵan.
Avtobýsta negizinen Kýrral-Grande men Ponta-Verde eldi mekenderindegi orta mektep oqýshylary bolǵan. Apattan avtobýs júrgizýshisi de qaza tapty, dep habarlady Inforpress.
Oqıǵanyń sebepteri anyqtalyp jatyr.
Aıta keteıik, keshe Qaraǵandyda avtobýs pen jeńil kólik soqtyǵysyp, bir adam qaza tapty.
Al «Saryózek – Kóktal» tasjolyndaǵy jol apatynan alty adam qaza tapty.
