Qabyrǵasy jarylyp, tóbesi kógergen: Qaskeleńdegi mekteptiń jaǵdaıy ata-analardy alańdatty
QONAEV. KAZINFORM – Almaty oblysynda Qaskeleńdegi mekteptiń jaǵdaıy qyzý talqylandy. Bılik ókilderiniń málimetinshe, mektepke kúrdeli jóndeý júrgizý jobasy daıyn, alaıda ázirge qarjy bólinbegen.
Áleýmettik jelide Almaty oblysy Qarasaı aýdany Qaskeleń qalasyndaǵy A.S. Pýshkın atyndaǵy orta mekteptiń vıdeosy tarady.
Kadrlarda ǵımarattyń jaǵdaıy máz emes ekeni baıqalady. Beınejazbada mekteptiń qabyrǵalary jarylyp, tóbesi kógergeni, edeni búlinip, radıatorlardan sý aǵyp turǵany kórsetilgen. Sanıtarlyq toraptardyń jaǵdaıyna da mán berý kerek.
Ata-analardyń aıtýynsha, mektep birneshe jyldan beri jóndeýdi qajet etedi. Sózderinshe, mektep aýmaǵynda tipti tolyqqandy sport alańy da joq.
Qarasaı aýdanyndaǵy A. Pýshkın atyndaǵy orta mektep 1964 jyly salynǵan. Qazir munda erekshe qajettiligi bar 40-tan astam bala bilim alady. Jalpy mektepte 1081 oqýshy oqıdy. Al ǵımarat 640 oqýshyǵa eseptelgen. Mektep eki aýysymda jumys isteıdi.
Qarasaı aýdandyq bilim basqarmasy mektepke kúrdeli jóndeý qajet ekenin rastady. Vedomstvo málimetinshe, ǵımaratty kúrdeli jóndeýden ótkizý jobasy bir jyl buryn ázirlengen. Endi ony júzege asyrý qarjynyń bólinýine baılanysty.
- Ǵımarattyń tozýyna baılanysty kúrdeli jóndeý júrgizýge arnalǵan jobalyq-smetalyq qujattama ázirlendi. 2025 jylǵy qyrkúıekte bıýdjet ótinimi Almaty oblysynyń qurylys basqarmasyna joldandy. Qazir jobany iske asyrý úshin qarjy bólý máselesi qaralyp jatyr, – delingen bilim basqarmasynyń jaýabynda.
Qarjy bólingennen keıin konkýrs ótkizilip, merdiger anyqtalady.
Eske salaıyq, buǵan deıin Qazaqstan mektepterinde 5 myńnan astam muǵalim jetispeıtini týraly jazǵan edik.
