Qabyrǵalary synyp, basy jaryldy: Aqtóbede jasóspirimdi avtobýs qaǵyp ketti
AQTÓBE. KAZINFORM – Aqtóbede 14 jastaǵy jasóspirimdi avtobýs qaǵyp, bala jansaqtaý bólimine tústi. Onyń birneshe qabyrǵasy synyp, ókpesi zaqymdandy, ashyq bas-mı jaraqatyn aldy.
Mektep oqýshysy 31 mamyr kúni Aqtóbe qalasy Ábilqaıyr han dańǵyly men V.Patsaev kósheleriniń qıylysyn kesip ótpek bolady. Bul - Aqtóbe oblystyq ákimdigi ǵımaraty aldyndaǵy jol. Velosıped mingen bala baǵdarsham tártibin saqtaǵanymen, avtobýs júrgizýshisi toqtap úlgermedi. Saldarynan balany birneshe metrge ushyryp áketti.
- Nemerem - №9 mektep gımnazııasynyń oqýshysy. «Avtopark» JShS-ne tıisili №15 marshrýt avtobýsynyń júrzigýshisi rettelgen jaıaý júrginshi jolynan ótip bara jatqan kezde qatty jyldamdyqpen tapap ótti. Qazirgi tańda nemerem hál ústinde jatyr. Basy jarylyp, bas súıegi ashylyp ketti. Sonymen qatar 9 qabyrǵasy synyp, ókpesine, asqazanyna zaqym keldi. Bul ne degen sumdyq? «Avtopark» JShS-i basshylary nege qadaǵalamaıdy? Balamdy qaqqan júrgizýshi bostandyqta júr. Polıtsııa habarlaspady bizge. «Avtopark» JShS-niń basshylary kelip, balanyń hál-jaǵdaıyn suraýǵa áreket jasamady. Balamnyń ári qaraıǵy ómiri ne bolady? Qala ákimi, polıtsııa departamenti shara qoldanýlaryńyzdy suraımyn,- dedi zeınetker Qojahmet Sarqulov.
Onyń aıtýynsha, velosıped avtobýstyń astynda qalǵan, al bala 20 metrge ushyp ketken.
Qazirgi kezde Qylmystyq kodekstiń 345 baby 2 bóligimen is qozǵalyp, tergeý júrip jatyr.
- Qazirgi ýaqytta bul derek boıynsha sotqa deıingi tergep-tekserý bastaldy. Oqıǵanyń barlyq mán-jaılary anyqtalyp jatyr.
Polıtsııa ata-analarǵa balalardyń, ásirese velosıpedpen júrý kezinde jol erejelerin múltiksiz saqtaý qajettiligin eske salady. Kámeletke tolmaǵandardyń qaýipsizdigin turaqty baqylaýdy qamtamasyz etýdi, balalarǵa jol qozǵalysy erejelerin, baǵdarsham sıgnaldaryn saqtaý qajettigin eske salýdy suraımyz,- dep habarlady oblystyq PD baspasóz qyzmetiniń jetekshisi Erbolat Sarqulov.
Oblystyq densaýlyq saqtaý basqarmasy baspasóz qyzmetiniń habarlaýynsha, bala neırohırýrgııa bóliminde em qabyldap jatyr. Jaǵdaıy turaqty aýyr.
- Júrgizýshi tergeý aıaqtalǵanǵa deıin jumystan shettetildi. Biz jaýapkershilikten qashpaımyz. Tergeý aıaqtalǵan soń qorytyndy boıynsha kómek kórsetemiz. Júrgizýshi 33 jasta. 8 jyldyq eńbek ótili bar eken. Ol bizde 2023 jyldan beri jumys istep jatyr. Qazir tergeý júrip jatqan soń mán-jaıdy aıta almaımyn. Tek ol 55 km/saǵ júrgen, ereje boıynsha 40 km/saǵ júrýi tıis ,- dedi «Avtopark» JShS-niń dırektory Aqarys Tileýlesov.
Eske salsaq, 2 maýsym kúni elordada jolaýshylar avtobýsy apatqa ushyrap, 15 adam zardap shekti. Jol apatyna aıypty dep tanylǵan júrgizýshi qamaýǵa alyndy.