Kabınette otyratyn jumysty kútpeı, qımyldaý kerek – qoqys tasymaldaıtyn kólik júrgizýshisi
AQTAÝ. KAZINFORM – Bekzat Uzaqbaev – Aqtaý qalasynyń tazalyǵyna jaýapty qyzmetker. 25 jastaǵy azamat Aqtaýda kásiptik bilim berý kolledjin temirjolshy mamandyǵy boıynsha támamdaǵan. Biraq 6 jyldan beri qoqys tasymaldaıtyn kólik júrgizýshi bolyp eńbek etedi.
– Jumystyń jamany joq dep oılaımyn. Qazir men eńbekpen adal tabys taýyp júrmin. Kabınette otyratyn jumysty kútpeı, qımyldaý kerek. Jumyssyz jatý – jalqaýlyq, - deıdi ol.
Bekzat jumysyn tańerteń qala halqy shyrt uıqyda jatqanda bastaıdy. Ózderine bekitilgen aýmaqtyń qoqysyn jınap, polıgonǵa tasymaldaıdy. Keıde kóligi buzylyp, jóndeýge týra keledi. Qarbalas jumystan úıine keshke bir barady.
– Biz jumysqa kirisken kezde qala uıqyda jatady ǵoı. Halyqqa qyzmet etip júrmiz. Keıde turǵyndardan alǵys ta alamyz. Jalpy kúnde tańerteń mindetti túrde medıtsınalyq tekserýden ótemiz. Tazalyqqa qatty mán beremin. Otbasym, 4 balam bar. Jumystan barǵanda balalarym aldymnan júgirip shyqqanda, sharshaǵanymdy lezde umytamyn, - deıdi Bekzat Uzaqbaev.
Bekzat ujymda eń jas jumysshy. Áriptesteri ony qamqorlap, árdaıym kómek qolyn sozady eken.
– Bárimiz tatýmyz. Bir-birimizge kómektesemiz. Bir kólik buzylsa, ony bárimiz jabylyp jóndeımiz. Sosyn ǵana jumysqa kirisemiz, - deıdi ol.
Qala tazalyǵyna jaýapty qyzmetker turǵyndardyń tazalyq saqtaý mádenıetine toqtaldy. Aıtýynsha, óz úıiniń tazalyǵyna beı-jaı qaraıtyndar kóp.
– Bir ókinishtisi, qoqys jáshigine salmaı, 5-10 metrden qoqysty laqtyra salady. Sol kezde jaqyndap salsa bolar edi ǵoı dep ishteı qynjylamyn. Qoqys jınaǵannan emes, keıde osyndaı túsinbeıtin, qalasyna, ortasyna qurmetpen qaramaıtyn adamdardan sharshaısyń. Keıde ózderiń sııaqty adamdar jınaıdy, qoqysty shashpańdar dep aıtamyz. Tazalyq qalanyń kórki, záýlim úılerdiń aınalasy taza bolǵany jaqsy, sony turǵyndar ózderi lastaıdy, - deıdi Bekzat Uzaqbaev.
Buǵan deıin, Mańǵystaýda túıeniń jilikterinen kádesyı jasaıtyn sheber týraly jazǵan bolatynbyz