Kabınetin sheteldik jumysshylarǵa jóndetti dep aıyptalǵan polıtsııa qyzmetkeri kinásin moıyndamady
AQTÓBE. KAZINFORM — №4 Aqtóbe qalalyq polıtsııa bólimi jergilikti polıtsııa qyzmeti bastyǵynyń orynbasary Aleksandr Bakshanovqa qatysty istiń jaryssózi bastaldy. Prokýror laýazymyn asyra paıdalanǵan qyzmetkerdi aıypty dep tanyp, 6 jyl 8 aıǵa bas bostandyǵynan aıyrýdy surady. Al sottalýshy ózine taǵylǵan aıyppen kelispedi.
№ 2 Aqtóbe qalalyq sotynda polıtsııa qyzmetkeri Aleksandr Bakshanovqa qatysty istiń jaryssózi oqyldy. Oǵan Qylmystyq kodekstiń «Bılikti nemese laýazymdyq ókilettilikterdi asyra paıdalaný» baby boıynsha aıyp taǵyldy. Oqıǵa byltyr kóktemde bolǵan. Memlekettik aıyptaýshynyń sózine súıensek, qala turǵyny qurylysta sheteldikterdiń, onyń ishinde Ózbekstan azamattarynyń jumys istep júrgenin kóredi. Keıin ol bul týraly polıtsııaǵa habar beredi. 102 nómirine túsken habarlamaǵa № 25 ýchaskelik pýnktiniń ınspektorlary baryp, shyn máninde 8 adamnyń jumys istep júrgenin kóredi. Sol sátte tólqujattaryn suraǵanymen, eshkimde de jeke basyn rastaıtyn málimet bolmaıdy.
— Bakshanov óz qyzmettik ókilettigigin asyra paıdalanyp, 8 sheteldikke qatysty isti qysqartýdy maqsat etedi. Olardyń bir bóligin ákimshilik jaýapkershilikten bosatyp, tek úsheýine hattama toltyrady. Ákimshilik is boıynsha ustalǵan adam polıtsııa bóliminde kóp degende úsh saǵat bolýy kerek. Bakshanov óz ókilettiligin asyra paıdalanyp, olardyń as-sýsyz 5 saǵat ustaǵan. Sonymen birge qurylysqa jaýapty jeke kásipkerge emes, sheteldik jumys kúshin zańsyz tartqany úshin dep ózge adamǵa 195 myń teńge aıyppul salady. Bakshanov sot sheshimimen Qazaqstannan shyǵarylýy tıis adamdardy óz kabınetine kirgizedi. Kabınettegi jóndeý jumystary vıdeoǵa túsip qalady. Ony jasyrý úshin Bakshanov kamera obektıvin qaǵazben japqan, — dedi jaryssózde prokýror.
Memlekettik aıyptaýshy kýágerlerdiń de jaýabyn oqydy. Onda sheteldik jumysshy basshynyń kabınetin jóndegenin aıtqan. Bul qyzmetine aqy almaǵan. Al sottalýshy Aleksandr Bakshanov bolsa, ózine taǵylǵan aıypty moıyndamady. Tipti qyzmette júrgen kezde izinen túskenin sezip, jumystan shyqqanyn, bir kúnnen soń oǵan aıyp taǵylǵanyn jetkizdi.
— Nege tek maǵan aıyp taǵylyp otyr? Qylmys jasalǵany ras bolsa iske qatysy bar qyzmetkerlerdiń bári jaýapqa tartylýy tıis. Ýchaskelik ınspektorlar meniń buıryǵymnyń zańsyz ekenin bile tura oryndasa demek olardyń da zań buzǵany. Olar da jaýap berýi kerek. Al jumys kabınetin jóndetýge keler bolsaq, quraldardyń bárin, qurylys materıaldaryn men óz aqshama aldym. Óz qarjymdy jumsap, jóndeý júrgizgenim qylmys bolsa, nege basshylarym jaýapqa tartylmady. Maǵan kabınetti jóndeýdi mindettegen bólim basshy da bolýy múmkin ǵoı. Ony nege teksermedi? Beınebaqylaý kamerasyn japqan dep aıtty. Kamera búlinbesin dep búrkep qoıdym, — dedi sottalýshy Aleksandr Bakshanov jaryssózde.
Prokýror Aleksandr Bakshanovty Qylmystyq kodekstiń 362-baby 4-bóligi 3-tarmaǵy boıynsha aıypty dep tanyp, 6 jyl 8 aıǵa bas bostandyǵynan, maıor sheninen aıyrýdy surady.
Eske salsaq, Hromtaý aýdandyq memlekettik kirister basqarmasynyń bólim basshysy kásipkerdiń 30-dan astam ákimshilik hattamasyn jasyryp, tek úsheýin toltyrǵan. Sóıtip aıyppul kólemin qysqartyp, ózi para aldy.
