Kabınetim de, kreslom da joq, jalaqymdy áli bilmeımin – Saıasat Nurbek

NUR-SULTAN. QazAqparat – Ǵylym jáne joǵary bilim mınıstri laýazymyna taǵaıyndalǵan Saıasat Nurbek jańa mınıstrliktiń qalaı qurylyp jatqanyn aıtyp berdi, dep habarlaıdy QazAqparat tilshisi.

«Mende kabınet pen ǵımarat ta, kreslo da, qyzmetker de joq. Kreslony áli tabý kerek. Kabınetti endi beredi. Ázirshe, biz burynǵy Bilim jáne ǵylym mınıstrliginiń ǵımaratynda otyrmyz. Búginde mınıstrlikti ekige bólý jumystary bastaldy. Biraq bul sál kúrdeli protsess. Bizge qazir úlken ákimshilik aýyrtpashylyq túsedi«, - dedi mınıstr.

S. Nurbek birinshi maqsat – mınıstrlikti quryp alý ekenin, áli jumys kóp ekenin aıtty.

«Bıyl men 41 jasqa toldym. Sońǵy 15 jylda jınaǵan barlyq usynystardy jınaqtap, óz bastamalarymdy júzege asyrýǵa ómirimde birinshi ret múmkindik berildi. Bir jaǵynan ishteı qobaljyp turmyn. Úlken úmit te bar. Halqymyzǵa qyzmet etip, eń bastysy Prezıdenttiń senimin aqtaý kerek. Jalaqymdy shyn bilmeımin. Meniń kelisimshartym áli joq. Zań turǵysynan mınıstrlik (Ǵylym jáne joǵary bilim mınıstrligi – red.) áli qurylǵan joq. Úkimettiń qaýlysyn daıyndap, jumysty ózime qabyldaýym kerek», - dedi S. Nurbek.

Buǵan deıin Ǵylym mınıstri otbasynyń Kıprden oralyp, balalarynyń Qazaqstandaǵy qatardaǵy mektepke baratynyn aıtqan edi.

Sondaı-aq, búgin Úkimet otyrysynda Ǵylym jáne joǵary bilim mınıstri laýazymyna taǵaıyndalǵan Saıasat Nurbek saltanatty túrde ant berdi.

Sýret:bilimdinews.kz