Qabyldanǵan zań aıasynda halyqtyń qaryzy edáýir azaıady - Májilis tóraǵasy
ASTANA. KAZINFORM – Májilis tóraǵasy Erlan Qoshanov palata otyrysynda qabyldanǵan qaryz alýshylardyń quqyqtaryn qorǵaý máselesine arnalǵan zańǵa qatysty túsinik berdi.
«Búgin óte mańyzdy ári qajet zańdy qabyldadyq. Shynymen de keıingi kezderi shamadan tys kredıt alý halyqtyń ishinde úlken problemaǵa aınalyp otyr. Memleket basshysy bul máselege alańdaıtynyn birneshe márte aıtqan edi. Prezıdent Joldaýynda naqty tapsyrma da berildi. Bul turǵyda depýtattar osy zańdy ázirledi», - dedi E. Qoshanov Májilistiń jalpy otyrysynda.
Onyń aıtýynsha, atalǵan qujatta azamattardyń qarjylyq problemalary týraly kótergen usynystary engizilgen.
«Osy zańda qarastyrylǵan jańa normalar qazaqstandyqtardyń qaryzǵa batýynyń aldyn alýǵa jaǵdaı jasaıdy. Sonymen qatar, adamdardy kollektorlardyń dóreki is-áreketterinen qorǵaıdy. Jalpy alǵanda, qabyldanǵan zań halyq arasynda qaryz kóleminiń edáýir azaıýyna septigin tıgizetinine senimdimiz. Azamattarymyzdyń áleýmettik jaǵdaıyn jaqsartyp, olarǵa qarjylyq erkindik pen senimdilik beretini sózsiz», - dedi Májilis tóraǵasy.
Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine kredıt berý kezinde táýekelderdi barynsha azaıtý jáne qaryz alýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
